South Africa nung hon atur 955 prongla temai adoktetogo

Theunissen, Feb 02 (Agencies) : South Africa nung hon atur parnok noklang teku ser tenemser pongu anogo ka dang talangba ongkhen nungi temai madokteti lir tanü Hokolbarnü parnok ajakji temai adoktetogo, ta iba hon atuba kibur, Sibanye Gold-i metetdaktsü. Power oadokba sülen parnokji madokteti timtema liasü.
“Parnok ajak temai adoktetogo; kar temang nungi tzü akongba aser kar high blood pressure agi kangshiba dak alaka shinga taküm mekümzüktettsüsabo mesüi lir,” ta otongdar, James Wellsted-i metetdaktsü.
Hon aturtemji ‘Beatrix gold mine’ nungi madokteti liasü; ibaji Welkom yimti anasa Theunissen jila nung lir.
Yipru tesashi aruba ajanga power oadokba sülen parnok temai adokba kol (lift) mapa meinyak anungji ‘night shift’ nung inyakertemji ghonda 30 shi temamadokteti liasü.
Engineer-tem ghonda aika meranga inyakea tanaben power arudaktsüba sülen hon aturtemji temai adoktet.
Asü-ama atalokba kar liasü asü (?) ta asüngdangba ka langzüdang, “Yamaji ataloktsüsabo parnok timtema maliasü saka parnok kanga dang aoksatepogo,” ta Wellsted-isa metetdaktsü.
AFP osangbeneri ashiba agi, parnok lungpok nungi madoktetba osang angashili ambulance aika hon atudak tesemji tonga aru.
Tanükertemi lungpok temeketji lungbanga ayu asünung, iba tsütsü jagi aoba gari lenmang nung hon atur kinüngertem tatayuyutepa adenshia liasü.