South Africa tsür Nel-Peters-i Miss Universe korang angu

Las Vegas nung taoba Miss Universe Iris Mettenaere (achiji)-i Miss Universe Demi-Leigh Nel-Peters nem korang semoktsüdang agiba noksa angur.

Las Vegas, November 27 (Agencies): Deobar aonung Las Vegas nung South Africa tsür Demi-Leigh Nel-Peters-i Miss Universe korang angu.
Taküm Miss Universe tetoktepba nung Miss Colombia Laura Gonzalez-i tanabuba aser Miss Jamaica Davina Bennett-i tasembuba takoktem angu.
Iba sentongji Planet Hollywood nung aliba AXIS theater nung agi aser Miss Universe tetoktepba indang putiotsü nung taküm nisung teimbai toktep. Miss Universe korang atema taküm tetokteper ajak agi parnok 92 liasü.
Arishi küm 22 tain Nel-Peters-i tawa tu business management nung degree ka angu. Lai iba korang anguba ajanga küm ka itasen, 2018 atema New York City apartment tajung ka aser tanga sempettem angutsü.
Yasüng lai France tsür Iris Mittenaere ket nungi korang angu. Yaküm Philippines nung Iris-i Miss Universe takok korang ngua liasü.
Nel-Peters ya North West University nungi graduate asü aser lai iba naroküm ajanga tetsür ‘self-defense’ pusema yaritsü ta ashi.
Miss Universe tetoktepba nung Nel-Peters dang tasüngdangba mezüngbubaji ‘tanü alima nung tetsürtemi ajuruba tebilemtsü tulutibaji kechi?’ ta asüngdang.
Idangji lai, “Tetsürtemi tebur den kasa inyak yonga teburi anguba dang nungi shilem 75 ang angur. Nibo kasa mapa atema kasa taa agütsütsüla ta amanger” ta langzü.
Tetoktepba nung tematiba menden asem nung alirtem dang tetendangertemi “nü dak aketba sempet koba ajanga na nüma atanger aser naia Miss Universe ka ama iba sempetji koma amshitsü?” ta asüngdang.
Iba tasüngdangba langzüdang Nel-Peters-i “Miss Universe ka ama, nai nü dak temulung alemtsüla. Miss Universe-i la tetsübutem koktettsüla aser tangar danga ibaji sayutsüla. Ibaji ni lir” ta ashi.