Spain-i Carles Puigdemont aputsü tetuyuba agütsü

Madrid, November 4 (Agencies): Hokolbarnü Spain-i Carles Puigdemont anema ken o ana benokogo aser iba ya ajanga taoba Catalan lennir ozüng agi alenbangogo.
Puigdemont-i aniba sorkari nüjiso sangdongba atema par sorkar anentsü aser iba sülen pa Brussels nung oa lir.
Madrid High Court-i Belgium dang Puigdemont aser pa den külem yariteper pezü aputsü atema tetuyuba agütsüogo.
Okadaki par pezü dang Brihostibarnü Spain tonga arutsü ashi saka parnoki ibaji magizükba sülen par pezü aputsü tetuyubaji agütsü.
Puigdemont-i Belgium nungi video conference ajanga kuli agütsütsü mepishi saka obendangeri ibaji magizük.
Brussels nung federal prosecutor kati ashiba agi, Belgian ketdangsertemi warrant ji tama reprangdangtsü aser iba sülen jiang obendanger dangi abentsü.
“Onoki asüng mesüra yanü investigative judge ka dangi abentsü” ta Eric Van der Sypt-i osangbener dang ashi.
Puigdemont-i December 21 nü Catalona nung snap election ka aginür aser pai ashiba agi, pai Spain nunger obendangba nung temulung malemer saka Belgian okadaktem denbo amalitepa yariteptsü.
1970s tatemlen Spain nung democracy aruba sülen tang linük nung tensa mejungi küma lir. Prime Minister Mariano Rajoy-i Catalonia madak ketdangsütsü tenzükba sülen election agitsü ayongzük.
Belgium nung European arrest warrant nokdangtsü tashi lir aser parnoki ita asem tashi nung Puigdemont Spain-i yoktsü mesra meyoktsü telemtetba agitsü.
Taoba Brihostibarnü High Court-i Puigdemont’er taoba cabinet nungi züngsem 9 aputsü tetuyuba agüja liasü.
“Onok ya ozüng melaba sorkar ka lir ta onüki züngshir. Spain nung atalokba osang ya alima nung metetdaktsütsüla. Sorkar ka tepuokdak yur elections agibaji tim masü” ta Hokolbar nü Puigdemont-i Belgian state television RTBF den jembidang ashi.
“Ni candidate ka asütsü renema lir. Tesem mashii ka nungi campaign mapa inyaktettsü” ta paisa shisem.