Spice Girls teloki UK aser US nung kentena senzütsü

London, Tsüklai 08, 2018 (Agencies): Tetsür temeja kentener telok, Spice Girls longjemba sülen parnoki UK aser US na nung tesem aika sema kententsü, ajisüaka parnoki ken tasen matentsü, ta osang angazüker.
Tejen züngsemtem longjemaka Victoria Beckham-ibo iba nungji shilem magitsü ta osang angazüka liasü, ajisüaka ibaji olulu ka dang liasü.
1990s mapang nung kentener telok Spice Girls züngsemtemi item sentongtem nungji ken tejen aika atentsü saka ken tasenbo matentsü, ta osang angazüker.
Taoba hopta Victoria Beckham-i iba telok tanaben longjemba nung adentsü ta osang metetdakja liasü.
Ano par telokisa television projects aser talent shows balala nung shilem agiba den külemi product endorsements nung shilem agitsü, ta osang angazüker.
Victoria Beckham, Mel C, Mel B, Emma Bunton aser Geri Horner nungeri 2012 Olympics closing ceremony nung tatembangbuba ken tena liasü, iba sülenbo tang ang parnoki longjemer ken atentsü.
Taoba hopta par pongu den parnok indang original manager, Simon Fuller nunger London nung Geri Horner’er kidang ajurutepa tanaben longjemtsü atema jembia liasü.