Sri Lanka nung Sinhalese aser Muslim nunger tsüngda mepetmesü adok

Colombo, November 18 (Agencies): Sri Lanka anüdoklentip tsütsü aliba jila ka nung sorkari sepaitem mapa lemzüktsüogo aser iba jila nung aonung curfew alitsü ozüng agütsü.
Galle province kübok Gintola nung tensa azüoka lir, ta Law and Order Minister Sagala Ratnayaka-i osangbener dang ashi.
Anogo ana tejakdang Sinhalese nunger aser Muslim nunger telok ana mangatettep adoka raraba sülen iba jila nung tensa mejungi aküm.
“Yasüng police battalions talila, police Special Task Force, anti-riot squad aser sepaitem mapa lemzüktsü aser parnoki tensaji azüok” ta minister-isa ashi.
Iba mepetmesü nung nisung 6 yiru aser parnok Galle yimti nung aliba maozü ki ka nung anepaludar. Iba dak sendakba nung nisung 19 pua lir, ta police-ia metetdaktsü.
Iba mepetmesü ya kechi atema adok’ar ano osang tejangja memetet lir. Nisung kari ashiba agi gari lendong ka ajanga mepetmesüji adok, saka ano karibo ali mangatettep ken o ka ajanga adok, ta ashir.
Ratnayaka-i iba tesem nung aliba yimsüsürtemi tensa tamajungba kümdaktsü ta ashir.
“Yimten telok kari iba mangatettep tila kaji Sinhala-Muslim tsüngda ken o ka kümdaktsü. Tiyazü osangtem ajanga nenok mashileni tanidaktsü ta ni nübortem dang mepishir” ta minister-isa shisem.
Sri Lanka linük nütsüng yongsük million 21 rongnungi Muslim nunger shilem 10 shi ka lir. Parnok ya Tamil nunger sülen telok tilatem rongnung tanabuba menden nung lir.
Sri Lanka nung nütsüng teimba alibani Buddhist tamanger Sinhalese nungertem lir.
June 2014 nung iba kasa tesem nung Muslim aser Sinhalese nunger tsüngda mepetmesü adoka raradang nisung pezü tepset aser iba amaji lendong matalokdaktsünür, ta ketdangsertemi ashi.
Buddhist nunger tali bilemloka oa amangba telok kati mepetmesüji adokdaktsü ta tai tonglokja liasü.

You must be logged in to post a comment Login