State 8 nung Hindu minority jenjang atema mepishiba SC-i magizük

New Delhi, November 10 (Agencies): India kübok state 8 nung Hindu nunger nem minority jenjang maongka agüjang ta mepishia benokba public interest litigation (PIL) ka Supreme Court-i magizük.
Hindu nunger atema minority jenjang meshiba state 8 ji- Lakshadweep (Union Territory), Mizoram, Nagaland, Meghalaya, Jammu & Kashmir, Arunachal Pradesh, Manipur aser Punjab state tem lir.
Iba temepishibaji magizüki tanü Justice, Ranjan Gogoi-i aniba bench-i, “Ajisüaka temepishiba benokeri iba onükji National Commission for Minorities matsüngdang benoktsü akok,” ta metetdaktsü.
Iba temepishiba file asüsang advocate, Ashwini Kumar Upadhyay-i, “State 8 nung Hindu nunger minority lir, ajisüaka minority indang temeten balalaji ozüng alema majority nem agütsür, kechiyong Centre sorkar mesüra state sorkartemi National Commission for Minorities Act, 1992 kübok parnokji ‘minority’ lir ta memetetdaktsü,” ta shia lir.
2011 küm nütsüng züngdangba census nung ajemdaker temepishiba shidi nungji yamai shia lir, “State ti nung Hindu nunger ya minority lir. Parnokji minority lir ta magizükba mesüra mezüngshiba ajanga tim masüba nung minority indang tajangzüktemji majority nem agütsür.”
Kasa temepishiba nungjisa, 1993 küm October 23 nü Centre sorkar sangdong ka kübok Muslim nunger, Khristantem, Sikhs, Buddhists aser Parsis ji minority lir ta sangdongbaji tim masüba dang masü saka tagidak maka aser India temzüng alema lir, anungji ibaji agientsüla, ta shia lir.