State sorkari ozüng alema arurtem meindoktsüla: CNTC

Dimapur, September 22 (TYO): September 21, 2017 aonung Chumukedima nung Bangladesh nunger asütsü ta temulung melemi bilemer kari Naga nunger kibong ka amakba khukhua aitsür aser ketdangsertemi aibelenertem ozüng tapet agi merenshitsü akhanger, ta Central Nagaland Tribes Council (CNTC)-i sangdong ka nung ashi.
Tsümartemi tanur tila aser tetsü adenba kibong ka amakba aser teka sangshibaji kanga süoki ia agitsüla. Iba tatalokba ajanga asenok asen li nung tiptema melitettsü ta asüba sayur.
Ozüng alema arua alirtemi asen nisung dak ozüng alema mapa jenti inyaka arur aser iba atema state sorkaria kechi tashi ka inyaka lir ta CNTC-i sangdong nung asüngdong.
Iba ken o ya tamajungba küma ao nungbo, iba tebilemtsüji state sorkari abentsü. Ozüng alema arurtem ajanga Naga nunger asoshi lendong tulu bener arutsütsü aser tarutsü putui timtemji ajurutsü. Ajisüaka, state sorkari iba khuret atema süoki i mebilemer, ta Media Cell sangdong nungsa shia lir.
Tang asen state-i ozüng alema arurtem aitba ya apidangra, Naga nunger tarutsü pututem atema ayatai asütsü aser parnok item tsümartem ya samatsütsü,
Tanü item nisungtemi ozüng alema inyakba mapatem ya lendong keta aliba tamaitsütem lir, anungji tanga atema masü saka talangka atema bilema asenoki item inyakyim anema mapa inyaktsüla, ta parnokisa metetdaktsü.
Inner Line Permit (ILP) ya district ajak nung mapa küma inyaktsüla aser iba atema inyakyim shitak alitsüla, ta CNTC-i takhangba agütsü.
CNTC-isa tribal hoho ajak dang iba onük atema longjemer mapa inyaktsü aser talisa tarutsü pututem atema bilemja tanü nokdaktsü atema mepishia metetdaktsü.
Parnokisa ketdangsertemi bendanger nem driving licenses, trade licenses, Aadhar cards, vehicle permits, residential certificates mashimashi agütsüba mapa meinyaktsü atema shisabuluba lemsatep.
Ano külen, Naga yimten telok kari ozüng alema arurtem parnok züngsem kümdaktsür. Iba inyakyim ya tesempatsü ka lir aser magizüker. Iba inyakyim ajanga Naga nunger nüjiso atema inyakba tangatetba menentsür aser sensamasatsür,
Centre sorkari state ajak dang pei pei state tem nungi ozüng alema arurtem parnok tarudaki meyipa yoktsü atema tetuyuba agütsüogo aser Rohingya nungertem indang osang sangoktsüogo. Ajisüaka, Nagaland state sorkaribo iba asoshi mapa kecha meinyaki lir aser iba ya ajanga sorkar tashi maitba, zübazülemba aser yimpazüa inyakba kuli sayur, ta CNTC-isa ashi.