Sumi Hoho, CCSU, NPO-i Chief Minister, TR Zeliang ajuru

Kohima, September 09 (TYO): Honibarnü Sumi Hoho (SH) nungi züngsem asemi CM Office nung state Chief Minister, TR Zeliang ajurua parnoki sorkar nungiter aser amaliteptsü, ta nenshia metetdaktsü.
Sumi Hoho-isa Nagaland nung Polytechnic tejentiba, Khelhoshe Polytechnic Atoizu (KPA), Degree College jenjangi ajungkettsütsü atema mepishiba den külemi infrastructure ajungkettsütsü aser ali kiburtem nem senotsü teyari agütsütsü mepishia liasü.
Item onük atema tongtibangsüa inyaktsü, ta shia Chief Minister-i, SH-i mepishiba ama pai Road & Bridges department dang iba tesem nung gari lenmang yanglushitsütsü atema metetdaktsütsü, ta nangzük.
Ano külen tanü Chang MLA tem aser Confederation of Chang Students’ Union (CCSU)-ia Chief Minister ajurua Chang kini administrative ka kübok liner, ta shia state sorkar dang, tang Noklak Sub-Division kübok aliba Chang nunger yim trokprongla Tuensang District administration kübok züngoktsü mepishi.
Iba onük nung ali tsütsü mangatettep mesüra kin dak sendakba ken o kecha mali, ta shia parnoki, tribal lenirtemia ketdangsüba tsütsü jenjang tajungba akümtsü atema inyakba mapatong ya melungogo, aser iba ya election dak rangloker inyakba ka masü, ta metetdaktsü.
Iba dak sendakba nung Chief Minister-i pai tim department den jembitsü, ta langzü.
Tanü Chief Minister ajurur Chang nunger MLA temji Horticulture & DB&GB Minister, Kejong Chang, Planning & Coordination Advisor, CM Chang aser NRE & F&ES Parliamentary Secretary, Toyang C. Chang nunger liasü, aser parnokia Chief Minister, TR Zeliang-i aniba sorkar tajungtiba agi nungittsü, ta metetdaktsü.
Ano külen tanü Naga Public Organisation (NPO)-i Chief Minister ajurua pa dang Myanmar nungi Naga nungertem atema Dimapur nung Guest House ka amenoktsü atema state sorkar teyari meshia liasü.
Naga Public Organisation, Myanmar (NPO) Deputy Chairman, U Nure Sosa aser Deputy Secretary General, Y. Khomong na leniba nung NPO nungi teshimtet teloki, Myanmar nungi Naga nunger atema Dimapur nung Guest House ka amenokra ibaji India aser Myanmar nung aliba Naga nunger tsüngda tongtepratepba Center ka ama akumtsü, ta metetdaktsü.
Iba dak sendakba nung Chief Minister-i akokba tashi yaritsü aser pai iba atemaji State Home Department den jembitsü, ta metetdaktsü.
Maneni tanga osang ka nung, tanü CM’s Residential Office Chamber nung Chief Minister, Nagaland State Bharat Scout and Guides (NSBSG) nung 10buba Patron Reaffirmation sentong agiogo.
Iba sentong ya NSBSG State Organising Commissioner (Guide), Vimezhonu leniba nung agi aser sentong nungsa Parliamentary Secretary, YR&S aser NSBSG Tir, Kikheho Assumi-a aden.
State Organising Commissioner (Scout), NSBSG, John Tochimong-i ketdangsüa tenangzükba agidaktsü, State Chief Commissioner, NSBSG, Atuo Mezhur Sekhose-i o tatsüka jembi aser NSBSG State Treasurer, K.Neibou Sekhose-i tepela anküp o jembia liasü.

You must be logged in to post a comment Login