Süngjang aser aonsotsü tapu balala achiba ajanga blood pressure ajema kümdaktsür

Bushisüngdang tasen ka ajanga ashiba agi, ‘potassium’ keta aliba chiyongtsü; potatoes, avocados, spinach, beans, bananas aser coffee ajemba ajanga ‘blood pressure’ ajema kümdaktsür.
“Sodium aketba chiyongtsü ajema achiba ajanga blood pressure ajemdaktasübabo jangja meteta lir, saka kulitem ajanga ashiba agi, ‘potassium’ aketba chiyongtsü achiba ajangaa ‘blood pressure’ ajemdaktsüba nung kasa tajangzük agütsütsü,” ta University of Southern California (USC), Keck School of Medicine nung Professor Alicia McDonough-i ashi.
‘Hypertension’ ya alima ajunga nung tebilemtsü tashidak ka lir aser iba ajanga nisung billion ka shi kangshir. World Health Organization (WHO)-i asadangtetba agi, alima nung stroke süa asüba shilem 51 aser temolungjang tashidak agi asüba shilem 45-o ‘hypertension’ ajanga lir.
McDonough-i alima nütsüng dak ‘sodium’ aser ‘potassium’ den ‘hypertension’ tesendaktep bushidangba ka ‘American Journal of Physiology-Endocrinology and Metabolism’ nung adokja liasü. Iba bushisüngdangba ajanga ngutetba agi, ‘sodium’ aketba chiyongtsütem koba ajanga ‘blood pressure’ tali kümdaktsür item chiyongtsü aika chiaka ‘potassium’ aketba chiyongtsütem achiba ajanga ‘blood pressure’ ajema kümdakstsür.
‘Potassium’ ajanga ‘hypertension’ ajema kümdaktsüba tajangzük tali jangjatsü asoshi McDonough-i tawa koya dak tendanga liasü.
Iba bushisüngdang ajanga nisung temangi azü nung ‘potassium’ jenjang azüoka ayutsü asoshi ‘sodium’ amshiba ngutet, koba temolungjanga, tezü aser shi tetsü asoshi tongtibang lir.
“Kodang chiyongtsü nung ‘potassium’ aketba chidir, tezüngjang (kidney) ajanga metsü aser tzü tali temangi yoker aser iba ajanga temang nung ‘potassium’ tali kümdaktsür, koba ajanga ‘blood pressure’ azüokba nung teyari agütsür,” ta McDonough-i ashi.
‘Potassium’ aketba chiyongtsü ajema achibaji ‘sodium’ aketba chiyongtsü tali achiba den kasa lir.
Institute of Medicine-i ashiba agi, ‘blood pressure’ ajema kümdaktsütsü asoshi nisung tain kati anogo nung ‘potassium’ aketba chiyongtsü gram 4.7-bosa achitsüla. Iba ajanga teret raksatsü aser tezüngjang nung lung kümtetba timtemtem ajema kümdaktsür, ta McDonough-i shisem.
(Source – Internet)

You must be logged in to post a comment Login