Sunjwan amakba nung Pakistan-i shilem agia mali: Pak

Islamabad/Srinagar, Tsüklai 12 (Agencies): Tanü Pakistan-i, yakünü kiralongrartemi Jammu & Kashmir kübok Sunjwan tesem nung army camp amakba nung parnok dena mali, ta metedaktsüba den külemi India-i arrtsü adener surgical strikes maotsüla, ta amokmerenogo.
Tanü Pakistan Foreign Ministry-i sangdong ka ajanga, “India nunger ketdangsertemi tajemdakdak makai otem jembi tenzükogo aser iba tatalokba junga bushisüngdang mesüi tiyazü nung tai tongloktsür,” ta metetdaktsü.
Kasa sangdong ajanga, “International linüktemi India dang Kashmir nung ozüng alema meimchir temeten anema inyakba mapatem anentsü aser Line of Control nung ozüng alema inyakba anentsü atema mepishitsü ta onoki imlar,” ta metetdaktsü.
Amongnüa Foreign Office-i sangdong ka ajanga, army camp amakba junga bushisüngdang mesüi India ketdangsertem aser osangbenertemi tajemdakdak makaba otem jembir, ta sangdonga liasü.
Pakistan Foreign Office otongdarisa, India-i Pakistan tenüng menüktsür aser rara ayongzüker, ta aitsü.
Yakünü Jammu & Kashmir nung army camp amakertemji Pakistan nung amenoka aliba Jaish-e-Muhammed (JeM) kiralongrar telok nungi züngsemtem lir, ta India ketdangsertemi tai tongloktsür.
Tesüiba ita ishika tsüngda India tamajungtiba amakbaji Küptoknü Sunjuwan Army camp amakba ya asütsü. Yakünep kiralongrartemi army camp amakdang India nunger sepai pongu den sepai ka tebu tepset aser tetsür tanur densema nisung 10 yiruja liasü. India nunger sepaitemia kiralongrar asembo tepsetogo.
India ketdangsertemi, kiralongrartemji Pakistan nung amenoka aliba JeM telok nungi asütsü südi ta sangdongba nung ajemdaker Pakistan-i, iba tatalokba junga bushisüngdang mesüibo tapi agi Pakistan nem tai metongloktsütsüla, ta metetdaktsü.
Pakistan Foreign Office-isa, India-i Kashmir nung ozüng alema inyakba aser meimchir temeten anema inyakba nembangtsü atema Pakistan nem tai tongloktsür, ta ashiba den külemi India dang, Line of Control (LoC) adener surgical strikes maotsü atema amokmerenogo.
Item tatalokba dak sendakba nung tanü Jammu & Kashmir Chief Minister, Mehbooba Mufti-i Centre dang state nung azüdokshiba anentsü atema Pakistan den ken o jembitsü atema mepishiogo.
2016 küm kiralongrartemi Kashmir kübok Uri nung sepai 18 tepsetba sülen Indian army temi Pakistan anema surgical strikes oa liasü.