Supreme Court-i Aadhaar ken o angadang tenzükogo

New Delhi, Aenjeti (January) 17 (Agencies): Bodhbarnü Supreme Court nung judge pongui akumba Constitution bench-i Aadhaar card, sorkar schemes balala den sendaktepba dak sendakba nung temepishiba ken o o angadang tenzükogo.
Temepishiba benoker aikati Aadhaar data prokba nung tebilemtsü kaa jembiogo.
12-digit number aliba Aadhaar, mobile phones, bank accounts aser sorkar schemes balala den sendaktepba anema ano temepishiba aika Supreme Court nung benoka lir.
Tamalen data nung aliba nija osangtem prokba atema o kanga toktepa liasü, ajisüaka sorkaribo item ajakji tiyazü, ta ashir.
Taoba hopta Aadhaar ketdangsüba tentet, Unique Identification Authority of India (UIDAI)-i Aadhaar Data inyakyim tajungba akumtsü atema ‘virtual ID’ aser aser ‘Face Authentication’ inyakyim benoka lir.
Tawa Supreme Court nung judge 9-i akumba constitution bench katia, linük temzüng nung Right to Privacy ji Fundamental Right ka lir, ta metetdakja liasü.
Temepishiba benoker aikati, Aadhaar ajanga nija ka temetentem anema inyaker, ta aitsür.
Parnok kari, Unique Identification Authority of India (UIDAI) number o bank accounts/mobile numbers sendaktepbaji ozüng alema lir aser linük temzüng alema lir, ta aitsür.