Supreme Court Judge 4-i Chief Justice anema apusor

New Delhi, Aenjeti 12, 2018: Tanü New Delhi nung Supreme Court nung Judge pezü- J Chelameswar, Kurian Joseph, Ranjan Gogoi aser Madan Lokur nungeri Chief Justice of India (CJI), Dipak Misra anema ayongzükba osangbenertem senden alidang tangokba noksa nung angur.  

New Delhi, Aenjeti 12 (Agencies): Hokolbarnü New Delhi nung osangbenertem senden ka nung Supreme Court nung judge pezüi Chief Justice of India (CJI), Dipak Misra anema, judiciary inyakyim meshidak aser ‘linük nung judiciary sadoka inyakba amokmeren tia nung lir,’ ta metetdaktsü.
SC nung judge pezü- Justices J Chelameswar, Kurian Joseph, Ranjan Gogoi aser Madan Lokur nungeri, onük karbo CJI den jembir aser tebilemba onüktem benoker, saka parnoki ashibaji CJI-i mangar, ta aitsü.
Osangbenertem den jembidang Chief Justice of India, sülenbo tanabuba jenjang nung senior, Justice J Chelameswar-i, “Khenkhenbo Supreme Court inyakyim tim mesüi inyaker, aser ibaji tesüiba ita ishika tsüngda ataloka aruogo,” ta metetdaktsü.
CJI anema Justice Chelameswar-i, “Onoki temepishiba onük kar bener inyakyim metongshitsü atema CJI ajurua metetdaktsü, ajisüaka onoki benokbaji shidak ta pai magizüktet, anungji onoki linük nüburtem dang sangdongtsüba dak alaka tanga lenmang maliasü,” ta metetdaktsü.
“Ita ishika tejaklena ozü pezüi Chief Justice of India (CJI) nem shidi ka agüja liasü,” ta parnokisa metetdaktsü.
Parnoki shidi ka ajanga, ken otem lemzüktsüdang temzüng nung aliba ama meinyakba parnoki metetdaktsü, aser temzüng nung aliba ama meinyakba ajanga linük nung tongti court telongjem raksatsü, ta metetdaktsü.
Parnokisa, kanga tongtibang ken otem nisung bendanga lemzüksür, ta aitsü.
CJI pa menden nungi anendaktsüner asü? ta asüngdangba langzüdang parnoki, “yamaji masü, ajisüaka iba telemtetbaji linüki agitsü,” ta ashi. Ajisüaka J Chelameswar-i, judiciary sadoka inyakba temeten makai kümra democracy amokmeren tia nung lir, ta ashi.
Osangbenertem senden tembangba sülen Ato kilonser, Narendra Modi-i iba atema o lemteptsü atema Law Minister Ravi Shankar Prasad jaokogo, ta osang angazüker.
Ano külen sorkar osang ajangabo, Supreme Court judge pezüi osangbenertem senden ayongbaji judiciary indang telung onük ka lir, anungji iba nungji sorkar tebang maitsü, ta ashi.
Sorkari osang ajangasa, SC-i iba onükji tekaratiba nung bentettsüla, kechiyong nüburtemi judiciary nung tamang akaba lendong nung lir, ta ashi.
Centre sorkari Judiciary nung amouker: Mamata
Supreme Court nung judge pezüi osangbenertem senden ayonga akaba sülen Trinamool Congress tongti aser West Bengal Chief Minister, Mamata Banerjee-i, Narendra Modi-i aniba sorkari Judiciary nung amouka inyaker, ta aitsü.
Centre sorkar aitsütsü maongka ngua Mamata-i, “Linük nung judiciary inyakyim nung sorkari amoukbaji asen democracy atema atangji lendong lir,” ta metetdaktsü.
Democracy lendong nung lir: Congress
Ano külen kasa onük nung Congress party-ia, SC nung judge pezüi SC inyakyim anema jembibaji Indian judiciary atema tebilemtsü tuluka lir, ta metetdaktsü.
Indian judiciary nung tang mezüng SC judge temi judiciary amokmeren tia nung aliba atema osangbenertem senden ayongzüka jembiogo, aser iba ya ajanga linük democracy lendong nung aliba sayur, ta Congress-i twitter ajanga metetdaktsü.
Congress-i parnok indang official Twitter handle ajanga, “Supreme Court nung judge pezüi Supreme Court inyakyim inyakyim atema tebilemtsü kaa jembiba atema onok kanga tebilemtsü akar. #DemocracyLendongNung Lir,” ta metetdaktsü.
Tanü SC judge temi osangbenertem senden ayonga akaba sülen senior lawyers aser Congress lenir ana- Kapil Sibal aser Manish Tewari nati Congress Tir, Rahul Gandhi ajurua iba osang metetdakja liasü.