Sushil Kumar-i ken o jangjashitsü

Indore, November 18 (Agencies): Anaben tashi Olympic medal kokteter alisang Sushil Kumar-i National Wrestling championship nung nisung asem tashi pa nem walkover agütsüba sülen pai gold medal anguba dak sendakba nung mepetmesü adokba nung telangzüba agüja ashiba agi, iba tensaji pa kabuma nung meliasü.
“Kü den tokteptsüpurtem merenemi lira ni iba amala tensa ka nung kechi inyaktettsü,” ta Sushil-i National championship nung yimya balaka nung Gold Medal koktetba sülen ashi.
Sushil den tokteptsü pur kari aküm tetushi agüja parnok bendanga agütsüba sülen pa tetsüng nung kongshir ao, koba referee-i ashiba agi aji parnok sobaliba lir.
Iba indang asüngdang dang Sushil-i ashiba agi, “Asayar ajaki pei senior tem akhüm tsübur, saka melangtepba mapang nungbo parnok ajak kasa dang lir. Ajisüaka iba ya bo tensa khenyongi balaka lir, kong asayartemi pei tata asayar den masayatsü asoshi telemtetba agi.”
Iba asayamung nung Sushil minute 2 ser second 33 dang asaya. Pa asaya tetenzük round len asayar ana den asaya aser iba sülen quarterfinal, semifinal aser final nung asayatsüpurtemi pa nem walk over agütsü.