T20 International: India tsürtemi tatembangbuba asaya kokogo

Bangalore, July 15 (Agencies): India’er tetsür cricket teloki wicket 3 agi New Zealand tsür madak takok ngua tasembuba aser tatembangbuba Twenty20 (T20) International asaya tanü Bodbar nü kokogo.
New Zealand teloki mezüngbuba asaya 2 koka T20 series-a akoktsü jenjang ngua aliba yong India-i tanü 3 buba asaya akokbaji par telok atema kanga dang senti lir.
India-i New Zealand telok nem runs 126 yangludaktsüba sülen par teloki over 1 anünga alidang runs 128 yangluteta New Zealand madak tanü takok angu.
Tanü asaya nung New Zealand telok tenüng nung Suzie Bates-i runs 34, skipper Sophie Devine-i 18, Kate Broadmore-i 15, Rachel Priest-i 14, Natalie Dodd-i 14 aser Maddie Green-i 10 yanglua liasü.
India tenüng nung Rajeshwari Gayakwad-i runs 17 agüja wicket 3 agiba den külemi, Poonam Yadav-i runs 16 agüja wicket 1 aser Ekta Bisht-i runs 23 agüja wicket 2 tashi agia tanü kanga junga asaya.
Par bowler-tem den yaritepa Veda Krishnamurthy-i runs 34, Vellaswamy Vanitha-i runs 28 aser Anuja Patil-i runs 22 yanglua kanga junga asayaba yong par teloki tanü takok angu.

You must be logged in to post a comment Login