Taiwan dang temelaba meshitsü menüngdaker : China

Beijing/Taipei, Aenjeti 18 (Agencies) : Tayimtsü jajaba lenmang tasen yanglutsü atema Taiwan dang temelaba meshitsü menüngdaker, ta China-i ajang-ajanga metetdaktsüogo.
Taiwan Strait adena tayimtsü jajatsü asameyangbaji tim masü ta Taiwan-i jashia ashiba sülen China-i iba osangji metetdaktsü.
Osang ajanga ashiba agi, küm ana tejaklen Democratic Progressive Partynungi Tsai Ing-wen, Taiwan Tir mendeni atuba sülen Beijing-i asentenshir parnok jashidakja arur.
China nunger tzüyimküm adena oor Taiwan kübok aliba asetkong anasa tayimtsü jajaba lenmang lapokbaji regional security anema lir, ta tan ita tetenzüklento Tsai-i metetdaktsü.
Taiwan-i ashiba agi, tan Aenjeti ita Taiwan Strait nung M503 ta ser tayimtsü lenmangji Taiwan dang masüngdangi lapok. Yamala tayimtsü lenmang melapokdang mezüngbuba ken o lemtepa jembitsü asoshi 2015 küm tezüngzüktepba agia lir saka parnoki ibaji anema inyak.
Aji oda süaka, Beijing yimti nung osangbenertem den jembidang China nunger Taiwan Affairs Office nungi otongdar, Ma Xiaoguang-i ashiba agibo parnoki 2015 tezüngzüktepba meraksa aser iba tayimtsü jajaba lenmang lapoktsüji Taiwan dang shiogo.
“Tezüngzüktepbaji liakasa tayimtsü lenmang lapoktsü atema Taiwan nunger dang temeleba meshitsüji menüngdaker,” ta M-isa ajang-ajanga shiogo.

You must be logged in to post a comment Login