Tajemdakdak Lung – Ibri 12:5-17

Taküm nung timtem anguba ajanga asenoki ajemalua aser tashi anga lidaktsür. Abraham Lincoln (1809-1865) Tsüngrem metetba aser takok anguba America president rongnung ka liasü. Pa lanuwa timtema liasü. Pa schooli küm ka tesadang shidang ao. Pa 1831 business nung tamakok angu aser 1832 nung legislature tamakok angu. Business nung tanaben tamakok angu. Pa tedong 1835 nung asü. 1838 nung speaker atema toktepba nung tamakok angu. Kodang kibong aküm, tebutsü pa atema tebilemtsü aküm. Pa jabaso pezü rongnung ka dang küm 18 tashi ali. Pa Congress nungi Senate aser Vice President nung tamakok angu. Saka 1860 nung President shim.
Alima tamakok mangur shinga mali. Tsüngrem meimertem asoshi tamakokji tatembang masü. Tamakok, mepetmesü, timtem, tesama aser temulung makai akümba ajakji kasa tia nung lir. Tsüngrem taochi kübok, item ajakji tashi angatsü angazükba mapa ama agizüktsü akok.
Kechiba Tsüngremi asenok item tia ajak ajanga anir? Ibri 12:9 nung iba telangzübaji süa agütsüba angur. “Asen shi teburtem asenok azüoktsü liasü, aser asenoki parnok dang akhüm tsübu. Ajangla asenoki tali tanelatem Tebu kübok taküm agia malitsü ama?” Yisua timatem saka Pai tamakok mangu. Tsüngrem chir nisung chir ama timatemba school nung tenüng tajung ngua tashi angaba den renem (Ibri 5:8).
Tia kar dak alaka tamakokji Tsüngrem o aser Pai mulungba nung tashi mangaba ajanga angur. Maneni tamakok anguba jagi Tsüngrem tsüngdang tezütanga akümer. Tamakok nungi asenoki mangazükra, asenoki tamakok dang angazüker. Tenüngsang Ken zülur nungi asenoki angazükdi: “Ni timtem agi metongi alidang ni aibilena ao; saka tangbo ni Ne O benshir. Ne telatet ozüngtem ni angazüktsüsa ni timtemdaktsübaji ni atema tajung lir” (T. Ken 119:67, 71). Tamakok jagi asenok ngasangatem raksatsür aser tashi angadaktsür.
Tongpang raraji tashi taiter dangi masü, tasemtepbaji tekarar dangi masü; aji saka ochi aser tamang katetba dangi! Takokji taochi ajanga nangzük! (S. Martin).
Takoksang Tsüngrem taküm timtem ajanga Ne O nung aser Nai mulungba tashi angatsü angazüktsü yariang. Amen.