Tajung, Tajungba, Tajungtiba

“Aser ya adok, parnoki külemi jembitepa asüngdangtepdang, Yisu anasa aru, aser parnok den ao” – Luke 24:15

Küm Tasen! Emmaus lemang atalokba otsüji küm tasen den koda tapet- “Yisu anasa ao aser parnok den ao!” School nung asenok grammar subject nung temedemdangba angazük- tajung, tajungba, tajungtiba. Ibai Lai item temedemdangba asem agütsür. Tajung- “Yisu pei sasa.” Temedemdangba tajungba- “anasa ao.” Tajungtiba- “aser parnok den ao.”
Item rongnung mezüngbubaji reprangdangang. Item adianu ana Emmus Lemang nung jashia külemi ao, parnok den tangar masü Yisu aden. Parnok shiba indang jembia liasü iba nübuji kangki nung angenloker külen aser shia arur külen kecha memelenshii parnok den dena liasü. Kasa Yisu küm tasen nung asenok den adenbaji koda senti! Yisuji tesüiba otsü aliba nübu ka dangbo masü. Masü, asen temeimba Master, asen tenük agi menguaka Pa nübu asenok den atangji dena lir; “Yisu peisasa” shibai asen mera shia den sendaktepa aor.
Tanabuba, “Yisu pa sasa anasai aru.” Pa maruaka, Pa teti ana liasü. Parnoki ngua Pa maruaka, tanelaren pa parnok anasa teti liasü. Aji oda Pa teti asenok anasa alir, aji saka mapang kar nung Pa aseni ngua arur. Item nisung ana Yisu indang jembia Pa parnok anasa aru ta asenoki angur. Lokti aiben asenoki Yisu indang mejembi mapang odaktsür! Aser iba nung kechi temoatsü magizüker! Kodang Yisu anasa arur teti Pai aseni mangateti aser memeteti aliba jungkai adoktsür, Emmaus lemang nung jajaba nisung ana dangjia Pa indang Laishibai shia aliba angatetdaktsü aser “amtsük sangsa” dang paa ta ajitetdaktsü. Iba küm tasen tenzükdang Pa asenok anasa arutsü. Pai lenmang tasen nung tabensaba jungkai adoktsü. Ibaji asoshi na renema lir ma?
Tasembuba, aser tajungtiba: “Yisu Pa sasa anasai aru aser parnok den ao.” Küm tasen nung tajungtiba tajungshibaji ibai lir! Aenjeti 1 nung shiba asenok anasa arur, Pai Luchii tatembangba anogo tashi asenok den alitsü. Pa kija shia den aor, anir, anüker, tasen kümtsür aser Pa taküm tajung asenok den lemsateper. Pai Pa pur telok meimer. Pai anü tesangwa nung Emmaus lemang nung jajaba ama asenok lemang kümdaktsüner. Küm tepiyong Yisui jembiba o agi asen mulungjang nung rongdakjang.
“Yisu”- apuoktsüba o
“Anasa aru”- parnok mulung nung bilemba Pai metet.
“Parnok den ao”- Kechi ochi parnoki angazük!
Parnok mulungjang arong.