Takok sülen (T.Ken 60: 1-12)

“Tsüngrem ajanga asenoki tasü itta raratsü kechiaser Pai tsükchirtem madak ajemshitsü” (t.12). T.Ken 60 ji yimya masü kechiaser Dawidi iba ken pa timtem nung aliba mapang züluba masü. Pa ken aika lungpok nung alidang mesüra tongpang rara nung alidang zülu. Saka iba ken ya takok tulu ngur külen zülu. Tsüngrem asoshi mitkartemi Edom nung takok tulu angu.
Iba ken nungi asenoki kechi angazüker? Mezüngbuba, takok sülen asenok kümdangtsüla. “Oh Tsüngrem nai onok sendokogo, nai onok raksatsüogo, na ain adoka liasü, saka tang onok dangi meyipang!” (t.1). Dawidi Tsüngrem dang ayimten aser ashi, “O Tsüngrem, onoki takok tulu nguogo. Saka ano idakji tongpang raratsü lir.” Tsüngrem nübur tulu takok tulu ngur külen tamakok tulutiba angur. Elijai Carmel Tenem nung takok tulu angu, aser iba sülen tasü meiti aküm aser tamakok tulu nung timatem. Asenoki tongpangji koker külen takok angutsü kümdangtsüla.
Tanabuba, asenoki teti Tsüngremer nisan amer. Takokji tembanger külena asenok Tsüngremer tongti tenyartem lir. “Saka shirnoki na tsübur parnok nem tekümdangtsü ka nai agütsüogo, anungji teraksatsüba nungi parnok kümzüktsü” (t.4). Asenoki ochiba nisanji amer kechiaser asenoki Tsüngrem O asoshi noktaker. Asenoki takok ngur külen asenok nisanji matsüzükli. Asenoki ibaji maneni Tsüngrem sentsüwangshi asoshi amdi.
Tasembuba, Tsüngrem nem asenoki sentsüwangshi agütsütsüla. Dawidi Tsüngremi kechi inyak ibaji asoshi tetushi ajak Pa nem agütsü. Asenok asoshi takok akhangtsübaji temela. Takok ngur külen ibai ashitsü temela, “Ibai ni inyak.”
Tsüngremi takok agütsür külen ne dangi amajok mapang ka arur, kechiaser nai mita malitsü akok. Aser tamajungbai na amaktsü mita atar. Nai takok tamaitsüji koda ajentsü? Teti Tsüngremer nisanji amang aser Pa nem tenüngsang agütsütsü tejangja süang. Tanaben Tsüngremi ne nem takok agütsütsü. Pa O ochi nung noktakang, aser asüküma bilem ajak temulungjangi maitdaktsütsü kümdanga liang. Tenüngsang ajak Tsüngremi agitsü tetemsü.