Takümsabo US embassy Yirusalemi belener maotsü

Washington, Aenjeti 18 (Agencies) : Küm ka tsüngda nungsa Israel nung lapoka aliba US embassy Yirusalem yimti bushia belener aotsü sentong renema lir ta nüburtemi bilembaji shidak masü, ta US Tir, Donald Trump-i jangjashitsüogo. Israel ato kilonser, Benjamin Netanyahu-ibo küm ka tsüngda nung embassy belentsüji imlar ta metetdaktsüba olen ka jangjashija jembidang pai ibaji metetdaktsü.
Küm aika US nungeri amshia aruba ama mesüi Trump-i yaküm Luchii ita tetenzüklento Israel yimtibaji Yirusalem ta agizükba osang sangdongogo. Iba sülen Tel Aviv yimti nung aliba embassy belener aotsü atema inyakyim tenzük saka iba jagi alima ajungalen aliba Arab kintem dang masü saka anüolen aliba linüktema mepeladaktsü.
Embassy belener aotsüji küm asem dang tatsübabo magitsü; idakji maparen aika lir aser diplomat alitsü atema kiojena anepalutsütsüla, ta taoba ita nungto US Secretary of State, Rex Tillerson-i metetdaktsüogo.
Yirusalem yimti ya Muslim, Yihuda aser Khristan yimsü amangertem ajak asoshi temeshi yimti lir.
Palestine nungertemi East Jerusalem koba 1967 küm Arab-Israel tongpang nung Israel nungertemi atsüngdok, ibaji aginer.
Israel nunger osangbenertem shirnok tang Netanyahu den India lima sema jajadagi, parnoki ashiba agi, “Bilemba dang nungi tekaraba ibaji ataloktsü ama kanga dang temulung lemteta bilemer-tang nungi küm ka tsüngda ibaji ataloktsü imlar,” ta Netanyahu-i metetdaktsü.
Netanyahu-i ashiba indangji asüngdangba ka langzüdang, “Yamaji masü. Taküm küm tatemlen na? Onoki tanga lenmang ka nungi atishia jembiba dang- Jüngdak maparen indang jembiba liasü. Anungji taküm kümbosa ibaji shibelena motettsü,” ta Reuters osang den jembidang Trump-i metetdaktsü.