Tamajung dang tajung ajartem

Tsüngremi tajunga ta ashiba ajakji nisungtem nem tamajunga ta amangdaktsütsü aser tamajunga ta ashiba ajakji tajunga ta bilemdaktsütsüba mapaji akhidang nungi Temenen Satan mapa liasü. Aji oda, tanüa alima nung Satan atema teinyaktsü mapa ajak agi nisungtem nem Tsüngremi ashiba o mangadaktsütsübaji lir. Tetenzükdangyongi Satani Adam aser Eve dang Tsüngremi ashibaji parnok atema majung ta shia mesüzük. Satani parnok dang Tsüngremi ashiba mangai inyak nung dang parnoka Tsüngrem mesüka akümtsü aser jangratema alitsü ta ashi. Aji oda, Adam aser Eve natia Tsüngremi kechi parnok asoshi majung ta ashi, ajiaang tajungba aser kechi tajung ta ashi ajibo tamajung asütsü ama bilema temenen (per)-i ashiba o ji angaba agi Tsüngrem nungi atakatem jenti angu. Iba sülena Satani maneni nisungtem mulungjang nung jembir aser mapa tamajung inyaktsübaji tajung aser shitak amato bilemdaktsür. Aji oda, kenü anogo Saul  chubai Amalek nungertem ajak makdoker külen, Tsüngremi ashiba ajak angaba nisung amato sayua ainker Samuel dang, ” Ni Kibubai melaba inyakogo” ta ashi ( 1 Sam 15:13). Ajisüaka, Tsüngremi ashiba amato Saul chubai meinyaki liasü. Tsüngremi pa dang Amalek nunger tetsür tebur aser tanur tain ajak tepsettsü aser parnok akaba ajak meshimeshia samatsütsü ashi. Ajisüaka, Saul chubai Amalek chuba taküm apu aser parnok meyong san aser nashi tajungtembo mesamatsüi pa agitsü anüngzüka ayu. Ajisüaka, Samuel dangbo pai item shirurutemji Tsüngrem nem tenla agütsütsü bener aru ta ashi. Tsüngremibo ajak samajang ta ser tashi agütsür yok saka apayuba agi pei agitsü taküm bener aru aser tangar dangbo itemji Tsüngrem nem tenla agütsütsü atema bener aru ta ashi. Satani mapa tamajung tajung ama bilema inyakdaktsübaji iba amaji lir. Iba ama nisung mulungjangji kanga tesempatsüka lir. Kodang Adam o Eve nati temenen mena Tsüngrem kanga jashia liasü. Aji oda, kodang Saul chubai Pai ashiba mangai inyak, idangjia Tsüngrem kanga mepelai aküm.Tsüngremi ashi, “Ni Saul chuba kümdaktsüba asoshi jashir.” 1 Sam. 15:11. Item ajakji temeneni nisung mulungjang nung Tsüngremi ashiba mangaba tajungba asütsü ta bilemdaktsüba ajanga lir. Saul chuba amaji tanüa asenoki aiben ochimashi lenmang nung bendenba rongsen tenla sabangi bener arur. Item rongsentem asoshi Tsüngrem nem tenüngsang agütsür. Item rongsentemji amshia Tsüngrem mapa inyaktsü ta ashir. Ajisüaka, Tsüngremi item tenlatemji magizüktsü. Kodang asenoki Tsüngremi ashiba manger aser Satani ashiba angar, idangji Tsüngrem jashir aser ashiko Pai asenok alimai yokba ya sasaseta bilemtsüa akok. Tangar temulung jungjunga meyiper Tsüngrem mapa inyaktsü asoshi pei akaba ajak yoker tenla agütsüba mapaji jangratemtsüka Anania aser Sapphira nati angu. Anungji, tenatia tena akaba ali rongsen kar ayok saka yokzüker külen sen ajungaji tenla agütsütsü apayua bilem, anungji tenati teyokzükba sen shilem kar agizüka yur tenladaki bener aru. Iba tenla senji Tsüngremi magizükba dang masü saka tena taküma dena sama. Asenokia tenlabo agütsür saka Tsüngrem nem  agütsütsü nangzükba ajungabo masü tesadangka agütsür, kechiyong yamaji inyaktsü asoshi Satani asen mulungjang nung jembir. Ochishia lira takar makümtsü, anungji takar kümnüra tera ochimashi inyakba atemabo kecha masü ta, tai saka shitak amato, Satani asenok den jembir aser asenoki yamaji inyaker. Tsüngremi ashiba manga nung dang Tsüngrem mesük akümtsü ta Adam aser Eve dang ashi ama, tanüa kasa satani asenok dang Tsüngremi ashiba anga nungbo teti timtema alitsü saka Pai ashi mangara Pa mesük jangratema alitsü ta maneni jembir. Ochi jembiba agi takok mangutsü, sübokrem mamshira mapa mangutsü, tashiyim mamshira makoktsü ta asen mulungjang nung jembiba ajungaji Eve den jembiba kasa per to agi asen den jembir. Aji oda, Isaia tapu 5:20 nung ashir, ” Shirnoki tamajung dang tajung, aser tajung dang tamajung ajar…..  parnok asoshi ayatai.” Kibubai Saul aser Annania nungertemi bener aruba ama tiyazü aser ochimashi tenla nung mepelar saka Pai ashi angaba nung pelar. Tsüngremi asenok dang tenla memeshir saka tashi angadaktsüner.