Tamajung tsütsü mebilemli

Taküm 2015 küm Nagaland nung India nunger Independence Day amongba sentong nung Nagaland sorkar tenüng nung Kohima nung Chief minister, Wb.T.R.Zeliang-i anir district headquaters aser tesem balala nung yimsüsürtemi jembiba onüktemji reprangdangra, kecha balaka terenlokba mapa inyakba aser inyaktsüba osang mali saka tongtibang onük ka shisema alibaji Naga yimten tebilemtsü ya tatem küma latettsüba indang shia lir. Atangji, tanü tensa Naga nunger asoshi onük ajak dang nungi iba onük yasa tongtibangba, anungji ajaki temulung agüja angatsü aser jembitsü nüngdaker. Naga nunger yimten temeten indang ya India yimten nüjiso mangudangyongi jembia aruba tanü tashi tatembang ka küma melatetteti aruba ajanga Naga nunger dang masü saka India dena akoksar aser Nagaland nung terenlok mapa takok ngua inyaka mouteti kangshir. Joko küm 60 dak tema kangshia arur asünungji Naga nungertemia yakta telemtetba aginür aser India-ia yakta dang telemtetba kabosa agütsüner ta asüba mapang ka nung tan August 3, 2015 nü India sorkar o India sorkar na tsüngda joko shitakba Naga yimten latettsü asoshi onük benoka jembiyonga aotsü atema tamendakdak onük kar nung sign sütepba jagi Naga yimten nung memenui atangjiba nung temelenshi kar arutsü imlar. Kechikomaka latetdir latetaka tang dang nungibo temaba aser tajungba yimten jenjang ka nung latettsü asoshi nübortemi imlar. Anungji, iba teimlaji mesamadaktsüi NSCN-IM aser India sorkar na pronglai shisatsü tesadem agi tarusü asoshi bilema latettsüla. Iba ama tajung ataloktsü tangatetba aser tebilemba nung Nagaland sorkari August 3 nung India sorkar o NSCN-IM na tsüngda lemtetbaji pelaa agizüker ta Nagaland Chief ministeri metetdaktsüogo. Atangji, telemtetbaji kechiar memetet saka temulung lemtetba agi agizükbaji tim inyakogo ta bilemer. Joko, Naga nungertem Naga yimten tebilemtsü tenüng nung timtemba aser tetsübu tia nung aliba agi lakseter yimten anogo tasen ka adokdaktsüner. Anungji, temeten liaka angutsü tamakoktsü süra kechiba tamakoktsü ka nungshia kazüdang putusa putu Naga nunger kangshitsü ? Iba tangatetba nung tanü lanurtemi Naga yimten tebilemtsü tatem küma latettsüba mapa nung ochi mulung agi tebang aser temulungjang lapoka shilem agira asüngbo anogo tajung ka arutsü. Ibai Akhidang gari lenmanga junga malidang Naga nunger Independence asüng bener arutsü, yanü bener arutsü ta jembiba putu mapang to masü saka nübortemi ajak meteta aser ngua dang Naga yimten jenjang ya latettsü. Ibayongji, Chief ministeri-a nisung shingaia NSCN-IM o India sorkar na tsüngda August 3 nü reremba telemtetba nungji tamajung mebilemdaktsüner ta metetdaktsüogo. Paibo kecha mashi saka NSCN-IM o India sorkar na renemba ken o nungji, tatishitsü agi, tang Manipur state kübok aliba Naga nunger lushi ajak sentepa Union Territory ka agütsü nunga asenoki pelashishia agizüktsüla. Ano, ibaji dang masü saka tang India kübok aliba state-tem arrtsü memelenshii Naga nunger ajak lokti tentet (Pan Naga) ka kübok alitsüsa yimten tashi dena Naga Hoho ama ka tentet nunga ibajia pelashishia agizüktsüla ta bilemer. Aji oda, kodang NSCN-IM o India sorkar na tsüngda tatembang küma telemtetba ka agitetdir, iba anogo nungji Naga yimten nüjiso bushia aruba telok aika rongnung NSCN-IM telok mali küma anentsü. Ibaji Naga nunger ajak asoshi takok tuluka asütsü. T.R.Zeliangi ashi ama, India ato kilonser, Narendra Modii Naga nunger asoshi tajung bilema lir aser pai Naga nunger akümtsübur, anungji tamajung tsütsü mebilemi pai Naga nunger asoshi tajungtiba inyaktsütsü imlaa atadi. Item ajak dakji alaka kobanü India sorkar o NSCN-IM na tsüngda telatetba onüktem tejangja tatem küma renemdir, idangji temelaba aser tebilemba meshia Nagaland state sorkar dangi arutsü imlar. Naga yimten tebilemtsü maparen nung NSCN-IM telok kija malinunga kanga ayongtsü, anungji tangar teloktem madenyonga parnok o India sorkar na tsüngda tangatettep kati arutetra, idangjisa state sorkari aser Naga nunger mulungtet teloktemi hai haura kaa agizüktsüla.