Tamakoker tazüokba (T. Ken 77)

“Kechiyong temeshi nisung tenetben laor aser ano saker; saka temenenpur lendong agi samatsür.” (A. Shin 24:16).
“Saka Tsüngrem shibai Khrista nung onok takokba nung teti anir, aser onok ajanga Pa temetetba tErunem ajaklen jungkai adokdaktsür, Pa tenüng sangang” (2 Kor. 2:14). “Masü, item ajak nung shibai asenok meim Pa ajanga asenok takokertem dang nungia taoba” (Rom 8:37). Item tekongtem ken-ken dang züngdangertem Khristantemi asenok taküm nung kodanga tamakok majurutsü ta bilemtsüa akok. Tsüngremi par chirtem tamakok nung melidaktsünüaka parnok ajungtsü asoshi Pai parnok taküm nung tamakoka yoker. Laishiba nung Tsüngrem nisung taküm otsü nungi tamakok tazüokba nungi shinga jenbua mali ta angazüker. Kechiba Tsüngremi asen taküm nung tamakoka agütsür kuli pungu.
1) Asenok ajemaludaktsütsü asoshi. “Asükümji teraksa tejaklen aor, aser ngasangatem agi ludaktsür” (A.S. 16:18). Asenok yimya agi, kodang ajak junga lidir asüakümer. “Tsüngremi asükümer nokdanger, saka ajemalur nem taochi agütsür” (1 Pt. 5:5). Tamakok jagi asenok ajemaludaktsür aser tila küma Pa tsüngdang lidaktsür süra Pai asenok dangi tamakok yoktsüji matidaker.
2) Asenok shisa kaa kümdaktsütsü. Kodang asenok taküm nung majurulir, asen takokji asen ajungba agi takok angur ta asenok tenüng agitsü. Laishibai asüngdanger, “Nai nisung pei kulak küpbong nung shisa kaa nguali ma? Pa dang nungi tamashir teyimla tali lir” (A. Shin 26:12). Tamakoki asen mapa meyipa reprangshidaktsür aser aseni metetba dang nungi memetetba timba lir ta angatetdaktsür.
3) Asenok temeim kadaktsütsü asoshi shibai tangar dang temeim makai amshir aser pei sasa sadoka alir Tsüngremi parnok dang sashia inyaker (Gal. 6:1). Peter tamakok ajanga pa adianu dang tenzüktsü temsüa kümdaktsü (Lk. 22:32). Kodang asenoki Tsüngrem temeim menakdangdir asenoki asen adianu timtem nung koda yaritsü metettsü (2 Kor. 1:3,4).
4) Asenok temeshiba kümdaktsütsü asoshi Temeshi nisungi mapang ajak nung kechiba pa shia bilemer asadanger aser adokdaktsübaji paidoker. Iba jagi takümji temeshiba kümdaktsür (2 Kor. 7:10,11). Tamakok nungi aseni angazükba lesson nungi tarutsü nung tsükchir anema kümdanga alitsü angazüker.
5) Metaloka lidaktsür. Asenoki tamakok mangu tashi ibai kijai inyaktsü makok ta kodanga mangazüker. Khrista Temang nung züngsem shinga pei sasa teperiba mali. Züngsem shia teyari nüngdak (Ef. 4:15, 16). Yisui Pa obendangba mapang nütsüngtem bushia liasü. Saka Peteri asüküma nütsüng ajaki toktsüaka paibo Yisu metoktsütsü ta ashi. Shibai akok, shibai makok asenoki metet.
Kibuba Yisu, kü tamakok nungi taküm renemshitsü lesson kü dang sayuang. Amen.