Tamalen Congress-i, aser tang BJP-i ochimashi nungi sen aazüker: Kejriwal

New Delhi, Tsüklai 17 (Agencies): Congress Party aser BJP naprongla aija Küptoknü (Honibar) AAP tongti lenir aser Delhi Chief Minister, Arvind Kejriwal-i, sen million aika nung Punjab National Bank (PNB) ahioktsüba ken o nung Congress aser BJP nati aitsüteper, ta metetdaktsü.
Chief Minister, Kejriwal-i twitter ajanga, iba ochimashi ken o ya 2011 küm tenzük, aser tang tashi lir, ta ashi.
Kejriwal-i, tamalen UPA sorkar mapang nung Congress-i item ama ochimashi ken otem ajanga sen aazüka liasü, aser tang BJP sorkari item ama ochimashi ken o nungi sen aazüker, ta aitsü.
Centre nung Ato kilonser, Narendra Modi-i aniba BJP sorkar aija AAP tongtii, iba kuliji ajanga ruling party, BJP-i Congress lenir kata tepoukdaki meyoker, ta aitsü.
Paisa, “BJP-i Congress nem tai tongloktsür, aser Congress-ia BJP nem tai tongloktsür. Ajisüaka ochiji- Congress yimsüsüba mapang nung aliba ochimashitem tang tashi lir. Tamalen Congress-i sen aazüka liasü, aser item ochimashi nungi tang BJP-i sen aazüker. Iba kuliji ajanga tanü tashi nung BJP-i Congress lenir kata tepoukdaki meyok,” ta metetdaktsü.
Tanü Congress-i osangbenertem senden ka ayongzüka jembiba sülen Union Minister, Nirmala Sitharaman-i, UPA sorkari yazü jembir aser BJP anema tai tonglokja PNB ochimashi nembangtsü meranger, ta aitsü.
“Nirav Modi dak sendakba ochimashi ken o nung chichiba temenen jibo 2011 küm mena,” ta BJP lenir, Sitharaman-isa metetdaktsü.
Iba ochimashi ken o nung Congress tongti lenirtem densema lir, ta shia Sitharaman-i, “Nirav Modi indang company rongnung kaji Fire Star Diamond International Pvt Ltd. lir. Parnoki ibaji Advait Holdings nungi angu aser shareholders rongnung nisung kabo Anita Singhvi lir,” ta ashi.
Anita Singhvi ya Congress otongdar, Abhishek Singhvi kinungtsü lir.
Ano külen Congress-ia, BJP-i Nirav Modi linük nungi jena odaktsü, ta aitsü.
Tanep Congress lenir, Kapil Sibal-i, Nirav Modi-PNB ochimashi ken o nung BJP densema lir, ta Ato kilonser, Narendra Modi-i magizükteter, ta aija liasü.

You must be logged in to post a comment Login