Tamang tongbang

Middle East linüktem nung Islamic State (IS) kiralongrartemi Khristantem reshikangshiba aser tepsetba anema June 07, 2015 nüa alima tesem aika nung Khristantemi tekülem kidang süoshi temeremso (orange) semer alima dang osang
sangoktsüogo. America nung sentong ayongzükertemi ashiba agi, reshikangshi tia nung aliba Khristan adianutem den kasa tia lemsatepba temaitsü, Khristantem süoshi temeremso semdaktsür IS-i tepsetba ama süoshi temeremso asemer. Taküm April ita nung Pope Francis-i, alima tesem balala nung Khristantem reshikangshiba asoshi tamangertemi olamadokimalitsüla, ta ayongzüka liasü. Reshikangshi tia nung aliba nüburtemindang osang sangdonga facebook nung ‘Wear Orange’ campaign tenzükogo. Iba ya tashiyim amshitsü ayongzükba mapatong ka masü, saka tamang tongbang ka lir. Iba mapatong ajanga, Tsüngrem chir Khrista dak amangba atema tepuokdak yua alirtem, alar tia nung alirtem,
reshikangshi tia nung alirtem asoshi maneni sarasademjang ta ayongzükba den sarasademtsü onük lemsateper. Khristantem reshikangshiba ya Yisu Khrista mapang nungi ataloka aruba ka lir.Mezüng tamangertema Yihuda aser Rom yimsüsüba kübok reshikangshidakja aruogo. Talisa Khristan yimsü dangimeyiper tamangertem jenti pei tamang asoshi süogo. Putu ajak nung Chuba yimli
aser yimsüsüba balala kübok Khristantem reshikangshidaktsüba asenoki puti otsü nung angur. Khristanmissionary tentet, Open Doors-i ashiba agi, tang alima nung Khristan nütsüngmillion 100 shi reshikangshi tia nung lir. Alima nung tamangba yimsü balala reshikangshi tia kübok alirtem shilem 100 nungi shilem 80 bo Khrista dak amangertem lir. Khristan tamangba yimsü ya Middle East nung tenzük, saka tesüiba küm noklang ka tsüngda iba tesem nung Khristan shilem 13.6 aliba nungi shilem4.2 tashi ajema aluogo aser anomaneni ajemtsü ta mongintemi ashir. Khristan taküm nung reshikangshi ajurubaji tim dang, kechiyong Yisu-i asenok dang, alimai nenok sempatsü, kechiyong parnokiNi sempa, ta shia lir. Middle East linüktem dak alia North Korea, Nigeria, Sudan aser Somalia densema linük aika nung amangbapurtemreshikangshi tia nung lir. India linük yabo ‘secular’ linük ka asüba yong tanga linük nung reshikangshiba ama asenokibo ajangshia mali, aser ibaji ajanga asenok aikati kangabo süoki iamebilemer. IS teloki Middle East nung par chuba yimli yangertsü meranger, aser iba yongji parnoki tamangertem reshikangshir. Ano külen nisungi mamangtettsüsa IS-i Khristantem reshikangshiba ngur Islam (Muslim) tamangertema aika Khrista dangi meyipdagi. Parnoki ibaji yimjak nung memetetdaktsür saka pei kidang tekülem agir aser TV nung Kibuba Benjung reprangzüka agiba osang lir. Tawa IS züngsem kati pungmang nung Yisu-i pa dang, “Nai Kü nüburtem tepseter” ta jembiba sülen Khrista dangi meyipba osang lir. Khristantemreshikangshiba osang ya Open Doors, Christian Solidarity International aser Voice of the Martyrs tentettemi sangdonger, iba den külemi
parnoki lenmang balala ajanga reshikangshi tia nung aliba adianutem yaridagi. Asenokia social media – Facebook aser Twitter ajanga iba osang sangdonga sarasadem nung abentsü asoshi amangbapurtem aser Arogopurtem ajungshitettsü. Asen adianutem reshikangshiba asoshi tamangertem sarasadem nung longjema alitsüji kanga nüngdak, aser takokeribo tanga lenmang ajanga yaritsüa koka lir. Timtem tekangshi ajanga Tsüngrem chirtem tsüngda kati ka süneptsütsü aser sasaradem nung abentsü asoshi ajungmesor. Iba ya tamang tongbang ka lir. Asenoki timtemtia nung aliba asen adianutem aser tsükchirtem asoshi sarasademtsüba nung Tsüngremi sayatenya mapa inyaktsü atema Pa teka tatsü masü; mesüra mangashitsüsa Pa tenarong anüa mali.