Tamentakdak kimong toktsü nungji asen kin timtem manener

– Imnaonen Longkümer, Chumukedima, Dimapur.

Naia koma bilemer ? Tanü asen Ao kin koba tia nung alir tsüraburi shina yutsüba ataloker. Shiti agi Mesü akümtsü, Mesü agi shiti akümtsü. Nenok lanur putu rongsen akaba tsütsü, kaket azüngba tsütsü tebang medem (tebang o tok alitsü). Ana kasa ati ta jembiba putu nenoki ajurutsü. Iba mapangji ka o ka na tsüngda timtem ajurutsü. Kümdanga melira nüji pur aika suwar akümtsü. Suwar aika nüji akümtsü.
Asen kin tamentakdakji Longterok aser Chungliyimti, saka tanü aliri ibaji meyipsatsütsü merangdagi. Saka ya tanga kecha masü, saka asen kini longterok, Chungliyimti nungi aru, Aonglenden Soyim aser Koridang iba tashiji asenok shilu ka dang, tzü masen lirepa tsüka süpu talem liasü. Ibaji Chungliyimti sümedem tashi nung ali. Idak nung jagibo nübo rena aodang tesem ajak leni prokshia pei mulongsü alitsü, medemer yimteter yim tasen küma ao. Yimji shibai anir aküm, shir kinsa liasü. Yim lepboka akümdang koba tensa ajuru, mapang den apet pei pei naroküm ajatsübaji tim liasü. Saka asenok tangatetba tila asü nung naroküm tenüng tuang amshia ao. Nai na jakzükba tarensen tu nü jabaso dang mashi, koba kin koba kidong nai mashi lia arudang yimkümer ajak tu süa adok. Jaboso jalatem long tuluba kübok tsüngken tetsü asüküm ama tarutsü tia memetet asen yim tila ka dak temulong lemer mapang ajak suitemdaktsü. Yimküm narokümdak alaka asen chirtemdang Jamir, Longkumer, Pongen taren toa rateta mashiji pei tenüksüng bushia ka o ka mashi lemputep. Kodang kidong tarensen mejangjai kümdir, tanü tang nungi asüngang tamajungba ajurutsü südi ta temulong shiranga bilemer. Kechiba ya ataloker ta süra, konang arishidang tebu teboua amar teyanglur Tsüngrema sentok, akhi obala kimonga toktsü, ojala nu menden nusem aremdaka amadokji ozü tateem ama oli aruli ta senzüdang asena arishi tema adoktsü. Laishiba ya Khristantem tamentakdak kimong, Laishiba ajanga sobaliba abensatsür. Sobaliba ajanga Lai o ji angateter. Ana kasa ati, ta langzütepba agi kecha majangzüktsü. Aseni ola tuluka adoka aruba agi kecha majangzüktsü. Asen dang Tsüngremi nung ta shira, panüji asen mapaji atemtsü. Nehemia 7 ji tadongi reprangdangang yangji shia lir. Israel kin tebuo jazukba tarensen Yihuda aibenlenyong semchir semnurtem Babilon nung alar küma alitsü pur ao. Parnok küm neter tashi alidang kin kidong tebou taren to ama adok aer mashi mashi den jabujaria lemputepa aoba ajanga tebuo mejangjatet aika liasü.
Küm 70 jakdang par lima Yirusalen nung pei senmang, ali kimong, parnoki toktsür aoba senmangtem to meyipa pei meyong alemtsü tenzük. Aser nübula bushitep, saka item tarur rongnung tebu tebuo dak jakzükba tarensen memetetba nübu noklang terok lir ana (642) putet. Anungji item nem senmang kecha melemzüktsü ta shia angutsü. Asen kina tabu tabou lima toktsür obala, ojala sayubentsü makatak lia rongsen penpudang alilen mereprangi anüng atar ora, temekok atsüktsü, tenütsü atsüktsü, meyiba arudang yimeri asen saru to majitettsü. Anungji asen yimli meimdi obala kimong apayudi, süra teyanglur Tsüngremi asen senmang nüjiba agütsütsü. Aseni kodang nüji tamentakdak aibelendir rongsen nung kaa itaka, kaket shisatsü tulu liaka kenshi oshir süaka, telok nung lenir ka süaka tatem nung pai aser lai aniba mapa nunga azükaru masütsü, aseni aniba telokji menden tamajung nung amen ama longshishitsü. Asen senmanger kata melii arishi atemtsü. Yamaji ataloka ngua aruogo.

You must be logged in to post a comment Login