Tanang aser Tasen (Yob 2:1-10)

“Yimjung anogo nung pelaa liang, aser tüokrong anogo nung bilemdangang: Tsüngremi kata kata yanglu, oda nisungi pa sülen kechi ataloktsüar mebushitettsüsa” (Sayu. 7:14).
Mapang ka nung koda ka sensaka alir palakaji tanelaren tashi taitba alir ta angateta liasü. Tang ibaji melenshir radio, television aser sayutsüngiba sabang ajak nung azükaruba dang jembir. Azükaruba indang sayutsüngiri talila oa sayutsüngir, “Na kümzüka lira anema alitsü aser rongsen akatsü!”
Anaprongla tali aobaji tai. Tsüngremi par chirtem junga aliba aser sensaka aliba tuozük shidak yutsür. Laishiba nung Tsüngrem nisung meshidakji ajangshia mali. Pauli ashi, “Sensaka alitsü aser peria alitsü aji ni metet. Kechisarena nung aser mapa ajak nung, sünga alitsüa aser yaa alitsüa, jenti kaa alitsüa aser anünga alitsüa, iba miim Oji ni angazükogo” (Fil. 4:12,13). Tsüngrem nisungi tia ajak nung temulung süa Tsüngrem Tenüng asangtsü angazüker. 3 Yohan 2 nung kaa alitsü sayu, “Temeimba, ne tanela koda renloker aji oda ajak nung na renloka aser anema alitsü ni sarasademer. Tanela nung kwika sünga lir ashitsü makok.
Tsüngremi asenok tanela junga alitsü dang moatsüra temangji koda asütsü. Timba mokokmin aser sensak tia nung dang alitsü! Tasen Lai nung taochi indang Pauli jembi saka pai temalen raratep aser telunglen tetsübu aliba indang zülu (2 Kor. 7:5). Lazar shibai kotaker temoatsü angu aser pa ali taküm nung nüngdak aser aya-tzüra liasü.
Tamangji asen nüngdak ajak angutsüba magic ka masü, mesüra sensak tia aser timtemji tamang nung tashi maitba tutettsüba ka masü. Ibri 11 nung tuzük shidak agütsüba sayur. Tamang ajanga parnoki agizükba aser tagütsübaa angu. Tamang ajanga azükaruba aser timtema angu. Tapu 11 ji junga züngang. Anüngdang koda alitsü mesüra aonung danga koda alitsü? (Lipok 1:5). Oh Tsüngrem, koda shisa taka!
Takümji Tsüngrem chirtemi ajangshia tepela aser tejashi agi yangluba ka lir. Saka asenoki teperi aser sünga aliba taküm ka kanera asenoki takoa aser tananga metettsüla! (H.S. Rice).
O Tsüngrem, Nai agütsüba takümi alima nung tajung aser tamajung onok taküm lenmang nung ajanga aodang Ne shisatsü angatettsü onok dang sayuang. Amen.