Tanguba ajak malili

Ibai benjong mapang asünungji nisung ajak mulungjang nung benjong tenüng nung langka tasen kabosa alitsü bilemba mapang lir. Ibaji dang masü saka ano kidang kinungertem den benjong tenüng nung aon tajung ka denbosa külemi pelatepa chiyongtsü bilemer. Ano, medemer aser kidang-kiyongertem nem benjong tenüng nung langkabosa agütsüner. Benjong mapang tepela den khuret yamaji arur aser item khurettemji koktet nung dang benjong pelatepa mongtettsü. Atangji, benjong mapang kechisüdir süaka süoshi tasen kabosa alitsüla ta masü mesüra tangar nem langkabosa agütsütsüla ta masü, itemji pei akaba yari inyaktsüla. Ajisüaka, nisunger yimya nung benjong süoshi aser chiyongtsü nung sen meindokra benjong among meshizük amai bilemer. Ibayongji, tang ama benjong mapang nisung ajak shishilembadak nungzütepba angur. Iba ama mapang nung shishilembadak tanguba ajak masü saka asen nüngdakang aliyonga aotsübaji kanga tongtibang asütsü. Asenok aikati shishilembadak asen nüngdak tama masü saka tanguba aser taginüba ajak aliyonga aor, idangji nüngdak alitsübo sen agi meperir. Dokan nungbo asenoki aginüba aika angutsü, ajisüaka taginüba apia alinungbo kodanga asen akaba agi meperitsü. Itemji tsüraburtem asoshi kidang kibong nung rongsen ketdangsübaren nung tongtibang teinyaktsütem asütsü. Atangji, tanurtemia tsüraburtem khuret meteta pei nüngdak dak alaka taginüba ajakbo memeshitsüla. Tanü kibong aika nung tsüraburtem shisabolubaji chirnurtemi bilemba aser aginüba matalokdaktsütetter, idangji kidang kibong nung mepelatep adoker aser tanurtem aika pei tsürabur khuret mangatet tamajung küma angur. Item ama mepelateptsüsa atalokba tensa tia ya, talisa, tang ama benjongbentsü mapang ataloker. Iba jagi benjong pelatepa amongtsü melen tejashitepang jashiteptsüsa akümer. Kibong nung iba ama mepelatep madoktsüsa tsüraburtemi chirnurtem dang kidangi belemseta mapa inyaker senotsü bener aruba aser endokba indang ashitsüla. Idangji dang tanurtemia tsürabur khuret angatettsü aser pei nüngdak dak alaka taginüba ajakbo memeshitsü. Ano, tanurtem nem kodang kibong khuret angatetdaktsüdir, parnoki meshitsü melen parnoksasa ayanga parnok nüngdak peridaktsütsü. Tanü putu ya alima nung abensüoshi, osettsüset aser chiyongtsü tapu balala tajungba saka jenjangbo dalangba asütsü toktepa yangluba mapang lir. Itemji ayoktsü asoshi nisungtem tenük jalutsüsa teyanglurtemi advertisement tapu balala tv aser osangkaker ajanga yoker. Asenok aika item noksatem nemji kokdaktsür aser ajung majung junga memetet aser nüngdak asü menüngdakar junga mapidangi asenoki alir. Alima nung ya Tsüngremi meimchirtem nüngdak asoshibo rongsen peria yanglua yuja lir saka nisungtemi item rongsentemji pei aginütsü agia amshiba ajanga meperir. Iba kasaji asen kibong aser taküm nunga aseni dang nendaka aser meranga inyakra asen peribosa Tsüngremi agütsür. Ajisüaka, asenoki asen nüngdak dang tali awashidang asenok akoksar aser perir anüngtsüba agi meperir. Atangji, ki oset süshia mesüra abensüoshi süshia talila akabajisa tajungba saka tang nüngdakbatembo yutsür talilabaji tama alira, iba jagi tebilemtsüang talila akümtsü. Taküm nung kechi mapa südir süaka, kechi tama aser kechi tesü inyaktsüla, aji metettsüla aser ano, kechi alitsüla aser kechibo maliyonga ajungtsü, aji metettsüla. Aiben asenok mapa nung tamakok angubaji asenoki tama inyaktsüba mapa tesü aser tesülen inyaktsüba mapa tama inyakdang ataloker. Iba amaji asenok taküm aser kibong nung medokmeperi aser sensak tia ajurubajia asenoki asen nüngdak nung masü saka asen tenük dang junga nguba aser temulungjangi aginüba nung senotsü mekümdangi endokba ajanga ajuruba timtemtem teimba asütsü. Asen nüngdak meteta kodang asenoki inyakdir, iba jagi dang asen taküm nüngdak mapatem bentetbenteta timmedemi otettsü.