Tanü KABA-i ayonga Clean Election aser worship nite sentong agitsü

Kohima, September 08 (TYO): NBCC ajanga Clean Election campaign ayongzükba kübok Kohima Ao Baptist Arogo (KABA) youth ministry-i ayonga September 9 (Honibar) 2017 anogo nung Kohima town nung Clean election rally cum worship nite ka ayonga akatsü; iba ya Kohima town nung aliba Aoer asoshi dang masü saka town nung aliba temolunger nübur ajak asoshi lir.
September 9, 2017 Clean election rally ya nikongdang 1:30 ako nungi tenzüka Old MLA hostel junction nung adenshia Heritage, Old DC bungalow: Kohima tashi yimyim ayima aser sarasadema atutsü.
Old MLA hostel junction nung NBCC nungi arurtemi tajungshi O den sarasadema tenzüker külen tarur ajak tetsüng agi jaja Heritage-i tashi atutsü. Heritage tonger külen yangji Clean election debating alitsü, aser iba debating nung lanur 12 agi shilem agitsü. Iba sentong lenir Mr. Colo Mero (member, NBCC clean election committee) alitsü. Iba sülen Mr. Khekiye Sema, IAS ajanga tayongzükba o tatsü ka shir külen, Power Faith band aser KABA Praise fountain team ajanga kenten sentong anitsü. Iba sentong nung Mr. Tiatoshi Longkümer, Asso. Pastor, youth, KABA ajanga Tsüngrem osang abentsü.
Iba ya Naga nunger rangben asoshi kanga dang tongtibang sentong ka lir. Anungji Kohima town nung aliba tanur-tain, lanur aser tsürabur ajak longsoa arutsü pelashishia jaoker, ta KABA-i metetdaktsü.