Tanü Lahore nung tongtipang by-election agitsü

Lahore, September 16 (Agencies): Pakistan nung Deobarnü Lahore indang NA-120 constituency by-election agitsü aser iba nung Prime Minister menden nungi atsüngdoker Nawaz Sharif kinungtsü tokteper.
“Asüng Lahorie nungertemi kütsü, Begum Kulsoom Nawaz shimtsü aser Supreme Court-i kübu anema oshidang agütsüba magizüktsü” ta Honibarnü Model Town nung Sharif’er jala Maryam Nawaz-i lar party pusemertem dang ashi.
Nisungtemi Begum Kulsoom nem vote agütsütsü aser ibaji nisung shingaia ballot mezüngmeshi asütsü makok ta asüba tenangzüba nung asütsü, ta laisa ashi.
Kulsoom ya tang London nung la throat cancer atema treatment agidar. La maliba agi Maryam-i tetsü indang election campaign agi. July 28 nü Supreme Court-i Panama Papers ken o nung Sharif PM menden nungi anentsü oshidang agütsüba sülen by-election agitsüsa aküm.
Iba menden atema Kulsoom aser Imran Khan’er Pakistan Tehreek-i-Insaf candidate Dr Yasmin Rashid na tokteptsü.
Iba constituency nung registered voters 320,000 shi lir aser Sharif’er kibong pusemer aika lir. Asüng election tembangli dang votes azüngtsü.
NA-120 ya Lahore kübok tongtipang tesem ka lir aser iba nung sorkar kiojentem aser tongtipang tesemtem lir. Iba jagi by-election atema Pakistan Rangers aser Army mapa lemzüktsüogo.
Iba constituency nungi Sharif-i asemben tashi takok nguogo.