Tanü Naga lima tia

-T. Tsükjem Jamir,
Senso Missionary, Longsa Baptist Church, Camp Dimapur.

J.P. Millsi ashir, “Naga nungerji ochishir kin” ta asenok ajak tejak tentettsüsa züluja lir. Aji oda tanü asenokji ochishir semchirtemji lir. Saka tanü koda tesasatsü kaji ochiji yimdong nung laoa lir aser asenok shingaia hau ta malii ochi dakji asen tetsüng agi ajemshir. Nagaland ji tanü koda masüba tia nung lir. Aor shin o ka nung yamai shia lir “Pei nok agi pei yiru ama”. Naga nungeri mapa tamajung inyakba agi tanü Naga nunger timatemer. Israel nungerji Tsüngremi Shimtetba kin lir, saka parnoki Tsüngrem dang tashi mangaba agi Tsüngremi parnok Tsüngrem memetetba kin Babylon nunger ket nung küm 70 tepuokdak yok. Item küm 70 tashi parnoki Tsüngrem mebushi tashi bendang lima nung timtema liasü ta Laishiba Aiatai kaket nung zülua lir.
India nung state 29 lir, item rongnung Nagaland ji 16 buba senior state rongnung dena lir. Tangar North East state dena ajak developed state kümogo, parnok state nung lenmang aser business ajak nung terenlok kaogo. Parnok state ajak nung department balala nung university asem pezü lapoka lir, aser high court temeja lapoka lir. Aser private factory aser institution balala aika lapoka aliba jagi parnok unemployment problem nung tebilemtsü tulubo mali. Tanü Naga nunger unemployed Youth lakh junga timtema lir. Tanü Nagaland nung employe tem 20% bo fixed pay labour aser W/C tem lir. Saka parnok nem itasen magütsüteter, ariena küm nung itasen anaben dang agütsüteter. Iba jagi Naga nunger timatemer. Taküm küm 2017 Govt. School 30 (Thirty) nung Matric result Nil adokba jagi Naga lima tia sayur. Govt. ibo tesayurtemji qualified tem dang shimtet, saka aikati pei wadang nung temulung magütsür. Aser ano tesayur interior area nung inyaker 20% bo tangar temelener inyakdaktsür. Item timtem jagi Govt School result ji majunger ta education research temi bushiteter.
Naga nunger atema 2017 kümji atakatem küm ka ta nüburtemi jembir. Naga nunger tia maka (2013-2017) küm pungo nung Chief Minister pezüben melentep, iba mapang Nagaland budget sen ajak terenlok mapatem inyaktsü melen parnok nüngdak nung sen endokma. Iba ataktemji Naga nunger tai maket (Innocent) dangi aru, Laishibai ashir “Temenen puri yimsü asüdang nüburtem asüktemer”, Dimapur ji Nagaland nung commercial centre ka lir, aser meimlaba mapang ka nung tongtibang apu (bridge) asem chirep. Ibajagi tanür school-i kilometer ka aotsü aliba nungi kilometer 10 paidoka leni jajar, pei gari aser transportation bus peria maliba agi timtem aika tanü tashi ajurur. Foreign tourist temi Dimapur aser Kohima atema remark yamai agütsür, kitembo kanga tulu aser tepor tajung first class, saka lenmangbo kanga majung third class” ibai yimsüsürtem tebilemtsü khuret asütsüla. Asenok Nagaland nung lenmang ajak Boarder Road, National high way, aser state PWD Road tem lir. Lemang ajak küm 30 jakdang yangluba black topping ajak samar lenmang kilentzü nung dang jajar. Joko lenmang majungba jagi Mokokchung to Dimapur ghonda 5 jajatsü melen ghonda 10 tashi jajar iba jagi garitem ajak mapang tatsüka tsüngda nung raksamar. Nagaland state ngur kulen N.No Govt. ajanga Govt quarter tajung aika yanglutsügo. Saka tanü Govt-i item kitemji meyanglushiba ajanga tulurtemi ajak dismental sur agiadokago joko tanü district nung officer aser staff talidak makaba ajanga pei office nung temulung agüja meinyakteter.
Tanü NBCC aser ABAM-i anir Clean Election indang lokti ajak nung meeting ayongzüka agir aser election atema video-a adoka reprangdaktsür. Kanga junger, saka clean election takokji laishiba nung Samaria tzürla mapa tamajung inyaker ka liasü, saka kodang lai Yisu ajuru, la temulung meyipa mapa tajung inyaktsü mulungtet. Yamaji Clean Election takokji candidate nungi tenzüka main agent party worker, aser yimtsüng aser town nung yimsüsürtem, Council chairman-i anir ajak pei taküm nung Yisu agizüka tekümtet karaa clean election takokji aji asütsü.
“TSÜNGREM MEDENI NISUNG SENTONG AGI ALIMA MELENSHITSÜ MAKOK”.