Tanü Narendra Modi-i Pakistan PM Nawaz Sharif ajurutsü

Ufa/New Delhi, July 09 (Agencies): Hokolbar nü Russia, Ufa nung India Ato kilonser Narendra Modi-i Pakistan Ato kilonser Nawaz Sharif ajurutsü, ta tanü osang ka ajanga metetdaktsüogo.

External Affairs Ministry otongdar Vikas Swarup-i twitter ajanga lenir ana ajurutsü osangji sangdonga liasü.

July 9 nü Vikas-i, asüng SCO senden aliba mapang anepdang 9:15 ako nung Narendra Modi aser Ato kilonser Nawaz Sharif na linük ana tsüngda tesentaktep senden amentsü, ta metetdaktsü.

Shanghai Cooperation Organisation (SCO) senden alidang mapang ka apir linük ana nungi lenir ana ajurutsüa akok ta imla liasü, aser iba osangji tangbo jangjaogo.

Ano külen Islamabad nung Pakistan Foreign Office otongdar Qazi Khalilullah-i, Narendra Modi-Nawas Sharif senden nung linük ana tsüngda tesentakep ken o tongtibang kar jembitsü, ta ashi.

“Senden ka amentsü asoshi India-i asüngdanga liasü aser Pak-i ibaji agizüka telangzüba agütsüogo, ta Qazi-isa ashi.

Yaküm November ita Nepal yimtiba Kathmandu nung SAARC senden nung lenir anaprong denogo saka tena majurutepi liasü.

Yaküm May 26 nü Narendra Modi Ato kilonser asoshi tenangzükba agiba sentong nung Sharif denogo aser tena senden ka mena liasü.

Lenir ana tsüngda sempet balala agütsütepba, sari aser sü tabenba den twitter ajanga osangtem lemsatepa aruogo, aser ibaji ajanga nuclear tashi aliba tsükchir linük ana tesentaktep tajungba akümtsü südi ta aikati imlaa liasü.

Ajisüaka arrtsülen tanen makai injang yokba ajanga security sepai aser nübur aika süogo.

India-i anemaka Pakistan-i Mumbai nung lendong agütsüba nung tongti aibelensang Zakiur-Rehman Lakhvi chiokba ajanga Delhi mepelai lir.

Hokolbar nü lenir ana tsüngda senden nung Pakistan-i Lakhvi chiokba onük densema kiralongraba onük süoka jembitsüa akok.