Tanurtem indang mayakoya noksa dang nokdangtsü: Sorkar

New Delhi, August 10 (Agencies): Mayakoya noksa website tem nokdangtsü asoshi benokba temepishiba Chief Justice HL Dattu-i aniba Supreme Bench kati angadangba mapang Attorney General Mukul Rohatgi-i, “Nija nung nisung kati mayakoya noksa reprangtsü temetenji sorkari pusemer,” ta ashi.

Sorkarisa Supreme Court dang, “tanurtem indang mayakoya noksa dak alaka mayakoya noksa onoki menokdangtettsü,” ta ashi.

“Iba ya, o jembitsü aser südoksünemtsü atema nisung ka indang temeten indang tasüngdangba ka lir,” ta sorkari ashi.

Linük sorkari kibong shia tua parnoki nija nung kechi noksatemsa repranger, ta mita moutettsü, ta Rohatgi-i shisem.

Anogo ishika tejaklen Central sorkari mayakoya noksa websites 857 nokdangba den külemi Internet Service Providers (ISP) dang item websites shiabangtsü tuyua liasü.

Ajisüaka tesülen sorkari ISPs dang iba ya reprangshimtsü aser website 857 nungi mayakoya noksa maliba tembo menokdangtsü asoshi tuyua liasü.

“Sorkari ISPs dang tanaben websites 857 reprangshimtsü metetdaktsüogo, kechiyong websites kar nungbo mayakoya noksa mali ta tashishiba osang kar sorkar dangi arua liasü,” ta official osang ka ajanga ashi.

Iba dak sentakba nung Communications & IT Minister Ravi Shankar Prasad-i, iba tenokdangba ya khen atema dang lir, iba tenokdangba ya Supreme Court nungi tetuyuba ka maru tashi dang alitsü, ta tamalen metetdakja liasü.

Iba onük nung July 08, 2015 nü Supreme Court-i, item ama websites shibangtsübaji nija ka temeten alema inyakba medem lir, ta shiogo.

Sorkari mayakoya websites nokdangba sülen aikati iba anema ola adokogo. Iba mera ya ‘Talibanisation’ medem lir ta shia social media amshirtemi, sorkari nija ka temeten anema inyaker, ta aija liasü.