Taoba NPF tiri pa sünütsü süa sorkar aser party madak ketdang asü: Neiphiu Rio

Dimapur, September 20 (TYO): Bodbarnü Dimapur District Sports Complex nung NPF president aser MP Neiphiu Rio-i aniba NPF General Convention ayongzüka agi.
Sentong nung Rio-i o jembidang, tamasa NPF Dimapur Division-i iba General Convention ayongtsü nangzükba aser iba den Organising Committee Convenor, Minister, Tokheho Yepthomi-i anir Dimapur District nung MLA tem, Division ketdangpurtem, Youth Wing, Women Wing, Minority, Farmer Cells aser Central Leaders ajak dang pelaba metetdaktsü.
“Onok iba sentong nung nisung 20,000 shi ka adentsü ta teimla liasü saka tanü 40,000 dak tema adenshiogo. NPF party len anitsü atema nenoki kü dak tamang akaba aser pusema nungitba atema kanga pelar. Ni President inyaktsü tebilemba kecha maliasü saka MLA tem, COBs aser party züngsemtemi kü nem iba maongka agütsüba atema kanga pelar. Kü kijai kecha meinyaktettsü saka asenok külemibo mapa aika inyaktettsü, anungji asenoki 1963 nungi Naga nunger taginüba atema tentetba antebong party asentenshidi” ta paisa ayongzük.
Tanü iba General Convention amungba anogo nung tetenzükertem- A. Kevichusa, Vizol, N. Zao Angami, Jatheo Lotha, Takasosang, Supongwati, Tajenyuba aser tanga lennir tajungtem bilemteter. Democratic Party (DP) ji Nagaland atema dang masü saka Naga nunger aliba tesem ajunga atema tentetba liasü. Iba party ji November 29, 1963 nü Election Commission of India den register asü aser party tamaitsüji antebong asütsü shimtet, ta Rio-isa ashi.
Kümtem süia arudang Democratic Party nungi United Front of Nagaland (UFN), United Democratic Front (UDF), Naga National Democratic Party (NNDP), Nagaland People’s Council (NPC) aser Nagaland People’s Front (NPF) ta nüngja melen aser July 28, 2009 nü Naga People’s Front (NPF) ta tatemsa melen.
NPF ya nübortem indang party ka lir aser party indang high command ji yimtsüng nung aliba nübortem lir, saka taoba tiri pa sünütsü süa sorkar aser party ketdang asü. Pa lenisüba kübok autocracy-i democracy melen aser nübortem tebilemba aser ola angatsü melena, pai party nungi anentsüba, meindokba aser disqualify asüba inyakyim ang tenzük. Parnok taginüba atongtsü atema NPF Constitution meyipa reprangshi ta Rio-isa aitsü.
“Ni iba party nung aso. 1974 küm ni Youth president aküm. Vamuzo-i Chief minister sür sorkar abendang ni Education Minister inyak aser Assembly maparen tiptema inyaktsü atema ni MLA ang asütsü mulungtet. SC Jamir-i aniba Ministry nung ni Home Minister aser Cabinet nung No. 1 liasü, saka Naga yimten tebilemtsü nung tebilembatem meputepba agi, ni sorkar nungi anen. Maneni, ni kü sasa mulungteta Chief Minister menden toktsü aser kü medemer aser külem inyakertem nem lenmang lapoktsü,” ta paisa shisem.
“Tesüiba küm asem sür tesadang ka ni dena tentetba NPF party-i ni anentsü, maaksütsü, mezüngmeshi aser Nagaland nungdang masü Delhi nung ni anema mapa inyak. Kü medemer aser külem inyakertemi ni party nungi anentsüba meyipa agiang ta mepishi saka taoba tiri parnok dena anentsü. Iba ama inyakyim janga tanü party aser pa asoshi tebilemtsü ya ajuru,” ta Rio-isa ashi.
Naga nunger taginüba aser talisa NPF party züngsemtem den MLA temi July 29, 2017 nü kü dang interim President inyaktsü asüngdang aser ni ibaji August 1, 2017 nü agizük. Iba sülen anogo 15 süir August 13, 2017 nungi ni NPF tir ama inyaktsüsa aküm aser ibaji tanü General Convention-i agizüktsü nüngdak, ta paisa metetdaktsü.
Tanü NPF general convention nung August 13, 2017 nü Dr. Shurhozelie Liezietsu tir menden nungi anentsüba agizüktsü lemtet. Parnokisa August 22, 2017 nü CEC senden nung Neiphiu Rio August 132, 2017 nungi tir asütsü shimba mulunga agizük aser pusema nungittsü bangzünga renem.
NPF general convention-isa Election Commission of India dang Legislative Party aser NPF Organisational structure agizüktsü aser Neiphiu Rio-i aniba NPF nem temeden agütsütsü atema ayongzüktsü lemtet.
NPF election manifesto nung yimjung maparen nung teyariteper ka ama shilem agitsü aser equi-closeness ayutsü indang shia aliba pusema nungiter aser Indo-Naga yimjung olemtep nung dena alirtemi ajaki tekaratiba nung Naga nunger ajaki agizüktettsüsa telemtetba ka agitsü ajungmesor ta NPF general convention-isa telemtetba agi.