Tashioktsür parnok 6 Shillong-i anir arutsü

Shillong, Septeember 13 (Agencies): Shillong tsür ka ket nungi sen lakh 21 kelakzüka agiba dak sendakba nung bendanger 6 aser tetsür ka, ta Meghalaya Police-i Delhi police teyari ajanga yashi Delhi nung puogo aser parnok ya Shillong-i Brehostibarnü bener arutsü akok.
Meghalaya Police Cyber Crime wing puri Brehostibarnü Delhi nung tesem balala nungi bendanger trok aser India tsür ka ta cyber-fraud ken o dak sendakba nung puogo, ta ketdangser kati ashi.
Osang agitepba mapang nung CID official Claudia Lyngwa, shiba Hyderabad nung lir lai ashiba agi, police temi aitsüa alirtem ya Shillong-i asüng anir arutsü akok.
Laisa ashiba agi, parnoki iba ken o tetenzük nungi asadanga anidaka arudar aser iba amala cyber crime ken o ya parnoki tang mezüngbuba bentetteter asütsü.Taoba mapang nung ibala mesükba ken o 3 nungi 4 tashi adoka liasü saka police-i ka danga obendang magütsütet.
Osang ajanga ashiba agi, tetsürla ya Facebook nung medemer kati ashioktsü. Iba medemsang yagi pa India nung arua lir ta ashi aser Delhi Airport nung pa dollar aika aser sen tasak jenjang sempet tem aika bena aliba ajanga custom ketdangsertemi soita lir, ta metetdaktsü.
Tang police temi pua alirtem ya Nigeria nunger Agodo Chinedu Frank, Oria Francis, John Onyekweli Ofodile, Toh Bi Gorgers, Angela Omoruyi, Guinean Barry Amadou aser Nagaland nungi Rose Sekhose, ta jangjaogo
Temetettsü kaji State Police-i mapang aben iba amala tashioktsür ket nungi kümzüka alitsü atema meita kümdangshia alitsü asoshi metetdakja aruogo aser iba den pei indang jurila osang tejengja social media sabang balala nung mejangjaba nisungtem nem magütsütsü asoshia metetdaktsüogo.

You must be logged in to post a comment Login