Taslima indang visa ano küm ka atsülangshitsüogo

New Delhi, August 21 (Agenciesa): Bangladesh linük nungi aritoka alila aser kaketzülur, Taslima Nasreen indang visa India Home ministry-i ano küm ka atsülangshitsüogo.

Bangladesh tsür Taslima-i la India nung maneni alitsü atema la visa atsülangshijang ta India sorkar dang mepishiba sülen home minister Rajnath Singh-i lai mepishibaji agizükogo.

Arishi küm 52 Taslima indang visa ji July 23, 2015 nungi tenzüka ano küm ka atsünglangshir, ta tanü Home Ministry ketdangser kati metetdaktsü.

Iba telemtetba dak sentakba nung Taslima-i osangbenertem dang, la visa ji ano küm ka atsülangtsütsü ta lai imlaa liasü, saka la kanga pelar ta ashi.

“Iba ya osang tajung ka. Kü dang iba osang officially bo memetetdaktsü aser iba osang ya nenoki tama kü nem metetdaktsüogo,” ta laisa ashi.

Bangladesh nung fundamentalist temi Taslima amokmerenba sülen lai 1994 küm Bangladesh toktsüba mapang nungi tenzüka la bendanglen alir aser 2004 küm nungi India sorkari la visa atsülangshija arur.

Tesüiba küm 20 nung la US aser Europe nunga liogo, ajisüaka lai India nung, talisa Kolkata nung teti atema jenoka linüba aiben lemsatepogo.

La mapa anema Kolkata nung Muslim telok kari la anema apusoba ajanga 2007 küm lai Kolkata toktsütsüsa aküm.