Tayimtsü ana tsüktep; nisung pezü asü

London, November 18 (Agencies): Hokolbarnü south England, Buckinghamshire nung tayimtsü ka aser helicopter ka, ta tsüktepba lendong nung nisung pezü süogo.
Iba lendong nung tayimtsü ana prongla nung mener anana asü, koba Aylesbury anasa Waddesdon Estate arem nung tsük, ta Thames Valley Police-i ashi.
Police tekolakba Rebecca Mears-i ashiba agi, lai asür tem tenüng tangbo mesangdongtettsü.
“Onok tinyaktsü tongtibangtibaji asür tem kinunger bushisüngdanga parnok nem osang agütsütsü aser takok tashi teyari agütsütsü,” ta lai ashi.
“Onok iba tesem nung Hombarnü tashi mesera iba dak tali mungzüktsü akok, kechiyong onoki maparen kecha aritepa minyakner, aser iba lendong atalokba kuli tejangja ngutettsü asoshi bushisüngdang kishia agitsü nüngdaker,” ta laisa ashi.
Tayimtsü anaprongla ya Wycombe Air Park nungi apusoa liasü, ta otongdar-i ashi.
Air Accidents Investigation Branch (AAIB) puri ashiba agi parnoki iba bushisüngdang nungita yaridar, aser tayimtsü tsükokba ya ‘light Cessna’ ka liasü.
South Central Ambulance Service-i ashiba agi, parnok nem tayimtsü ana tsüktepba osang Anüngdang 12:09 ako nung agütsü.
“Onoki iba tesemi Thames Valley air ambulance, ambulance crew ana, ambulance ketdangser ana aser rapid response vehicle ka densema tanga resource tem yoka liasü,” ta otongdar kati ashi.
Iba tesem nung alir atsü ayimer kati osangbenertem dang, mezüng pai tayimtsü ana tsüktepba angashiba sülen oa tesem nung tayimtsü tsüker ronga aliba ngutet, ta ashi. Paisa ashiba agi, tayimtsü tilabji kanga mejungi ajasar liasü.