Teberem angoba anepaluyim

September 30, 2017: Teberem angoba, talisa teberem tsünglanglen angoba ya nisung aika dak ajangshiba timtem ka lir. America nungbo nütsüng shilem 85 dak temai teberem angoba ya pei akümli mapang nung mapang ka nungbosa ajangshir. Mapang talang ka nungi teberem angor (chronic patients) temi ayang-ashiba ajema akümtsü asoshi mozü dak metaloker aliba dang nungbibo tanga lenmang ajanga anepaluba tajungba.
Pei kidang teberem anepaluyim:
Arakzüa alitsüla: Asen temang nung tongtiret (spinal) ya asen temang nung arakzüba tanga shilemtem ama lir, anungji arakzüa alitsüla. Anogoshia inyakba mapatem tilateri inyakang, saka anibelema meinyaktsüla. Nü temang tajungba kümra tera asemzütsüla.
Temang atsüshitsüla: Mapang talanglang menoktaktsüla mesüra mener mekazütsüla, minute 20 shia noktaker nü temang atsüsatsü merangang. Nisung aika mapa inyakdang tera nema lur mapang talanglang inyaker asünungji mapang shia noktaker temang atsüsatsü nüngdaker. Teberem atsüsaba dang masü saka teka aser tetsüng-a songlatsüla.
Nü temang touzük seret shitak ayutsüla: Mapang shia nü temang touzük seret odanga nü tar den temang touzük tesütep ayutsüla, kechiyong temang touzük tali süra nü tongtiret taliba nenkangdaktsür.
Mapang peria amoi aotsüla: Teberem ashiba ajanga ayip majanger. Mapang talang ka nungi teberem ashir nisung asem nungi nisung anabo ayip majanger. Ayip majangba ajanga teberem ashiba tamajungba akümtsü. Ayip ajangtsü asoshi coffee mesüra süngo ajema ajemtsüla, chiyungtsü shitak achitsüla, exercise shtitak agitsüla aser shisabulu nem mokokdaktsütsüla.
Temperature teyari agitsüla: Tongtiret tsünglanglen angoba ajema akümtsü asoshi mapang shia tzü temokong aser tatsük napronglai alettsüla. Kidang rür (ice) mesüra gel agi mapang shia letang iba den külemi tatsük agi alettsü asoshi tzü tatsük/talem nung metenoker kazütsüla mesüra bottle nung tzü tatsük inoker alettsüla.
Iba dak alia exercise, temang nemshiba, tangu talanglang agiba, dark chocolate achiba, nai meimba ken angaba aser lokti nung adenba ajanga-a nü timtem nung yarisemtsü.
Source-Internet