Teimla kabo sayur !

Naga yimten nüchiso bushir telok NNC aser NSCN teloktem ajak agi telok trok longjemba telok Naga Nattional Political Groups ajurutsü atema India government tenüng nung Naga nungertem den Naga yimten onük jembir R.N.Ravi tanü Dimapur aruba yagi Naga yimten tebilemtsü latettsü asoshi mapang anasabai arur südi ta angatetter. Atangji, kasa Naga yimten tebilemtsü latettsü atema India government den NSCN-IM telokbo 1997 küm nungi jembia arudagi. Ajisüaka, taoba küm metsü tashi nunga telemtetba kati maruteti alidang, tanüngba Naga nunger linük tenzükertem telok trok longjemer Naga yimten tebilemtsü ya tekaratiba nung latetnüa India government den jembi tenzükbaji nübortemi aginüba mapa ka lir. Tang Naga nungertemi aginübaji Naga yimten tebilemtsü ya NNC telok kati masü mesüra NSCN telok katia masü saka parnok ajak külemi ken o süoka lemteper külem telatetba ka bener arudaktsüner. Iba tangatetbaji Naga nunger lokti tentet ajungai Ravi ajanga India government nem metetdaktsüogo. Ashiko, joko küm metsü tashi kasa yimten ken o benoka jembir asünungji India government o NSCN-IM telok nabo telatettsü kabo latetter alitsüa akok. Ajisüaka, Naga nungertem taginübaji Naga yimten tebilemtsü ya joko teti atema telok ajunga den külemi latetdaktsüner asünungji, iba taginüba olaji angateta tatem atongtsü merangba mapa kaji Ravi-i NNPG den jembitsü tenzükba mapa ya asütsü. Parnok oagi Delhi nung mezüng ajurutepa jembiogo aser tang Dimapur nung ajurutepba ya tanabenbuba asütsü. Iba senden nung NNPG purtemi India government nem Naga yimten latettsü asoshi onüktem agütsütsü imlar. Joko, NSCN-IM teloki asüyonga mesüra NNPG teloki asüyonga yimten ken o nung India tsüngdang asüyonga, Naga nunger tsüngdang asüyonga matsükshishii pei temeten aser taginüba indangindanga süoka jembi tenzüktsüla. Naga yimten tebilemtsü latettsü asoshi telok aika den onük balala jembitsü menüngdaker, anungji joko tang nungibo NSCN-IM aser NNPG telok ajak külemi takdang ka nung adenshia India government den jembitsüla. Iba amaji külemi mener mejembi tashibo ken o mamentsü aser telatetba kati marutettsü asünungji, ano tang nungi Naga nunger kin shia (tribal hoho) nungi lenirtemi ajungshia NNC aser NSCN telok ajakji külemi India government den mendaktsütsüla. Iba tangatetba nung ano khen FNR teloki Naga nunger linük tenzüker telok ajak jatepa jembi nung ajungtsü amai bilemer. Tang ya Naga nunger asoshi Naga yimten tebilemtsü latettsü asoshi mapangbo tajung ka arur amai ser nung, ano külen Naga nunger tia majung kaji tema nunga Naga kin ajak asoshi jembia inyaktsüsa lokti tentet sabang kata maka tim atemba mapang lir. Iba ama mapang ka nung asenok Ao kini danga Naga nunger lokti tentet ENPO ama, CTNC ama, UNC ama aser NTC ama Mokokchung nung ka khen, ka khen ta jaoka Naga nunger telongjem asoshi jembi tenzük nungbo iba jagia Naga yimten tebilemtsü latettsüba nung kanga yarila. Naga nunger ajaki longjema linür aser Naga nunger ajaki yimten telatetba tekaratiba nung arudaktsüner saka Naga nunger telongjem indang jembitsü senden ayonger mali kümogo. Naga kin asoshi iba ama timtem aser nüngdak reprangteta asenok Ao kini lenmang kabosa sayutsüla. Khen khen Delhi nung aser khen khen Nagaland nung ta India government tenüng nung jembir den Naga nunger Naga yimten teloktem ken o süoka jembibaji junger. Ajisüaka, kasa Naga yimten ken o ya Ravii NSCN-IM den table ka nung aser NNPG den tanga table ka nung ta senden balala mena telatetba ka dangi marutettsü. Anungji, majurutepnüyonga mesüra külemi memennüyonga Naga nunger asoshi tarutsü bilema NNC aser NSCN telok ajak table ka nung ajurutepdaktsütsü nüngdaker. Ashiko, ibajibo Ravii meinyaktettsüa akok. Aji oda, Ravii Nagaland tonga aruagi Naga nunger linük tenzüker balala den Naga yimten ken o süoka jembidang, asenok mapaji Naga nunger linük tenzükertem ajak table kati India government den ken o jembii anir arutettsüla. Ibaji meinyaktet tashi, ken o bo shitak jembia odagi ta ashitsü saka telatetba kati marutet, tang amai timatemtsü.