Teintet rogotem temang anema alitsü teinyaktsü kar

November 04, 2017: Alima nung Tsüngremi atakzüktsüba anogo tashi arishia taküm anema alitsüji koda tajung. Tantsür tambur kümaka temang anema lia kanga arishia alitsüji Tsüngremer sempet.
Teintet rogotem (arishi küm 65 ser temapur) temang anema alitsü teinyaktsü kar:
* Exercise teti agitsüla: Nai exercise tasak magitetaka tetsüng-teben aser temang ajak songlaa jajatsü mesüra asemzütsü akok. Exercise agiba ajanga temelungjang tashidak balala, diabetes, shisabulu aser temang ayangashiba ajema akumtsü.
* Chiyungtsü tajung achitsüla: Metsü ajema achitsüla, teintet rogo aikati metsü tali achiba ajanga temelungjang tashidak balala adoker. Süngjanglijang aser süngolemba peria achitsüla.
* Nü tekolok anepalutsüla: Arishi küm 65 ser tema süaka taküm nung maneni aika angazüktsü atema jangratsüla. Langka tasen kar angazüktsü merangang, oshi tasen ka angazüktsü merangang aser akoba tashi lokti nung adentsü merangang.
* Tesendaktep yangluang: Tantsür tambur akumdang nisung aika kija alir aser lokti nung madener, aser item kuli ajanga tali azüngmeyaker aser shisabulur. Kinunger aser medemertem den osang-olatepa tesendaktep yuang. Pei züngar ajurua sensaksemang, mapang shia sentong balala yanglua züngar den külemi mapang indoktsü merangang.
* Peria mejangtsüla: Meimchiri memejangba dang nungibo mechiyungi talangba litettsü. Kinü tanuri peria mejangtsü nüngdakba ama tantsür tamburtema peria mejangtsüla (ghonda 8-9). Peria memejangba ajanga shisabulu adokdaktsür aser shisa ramadaktsür. Anungji peria mejangtsüla.
– Source : Internet.

You must be logged in to post a comment Login