Teküp cancer nungi kümzüka alitsü tasa kar

Taküm küm asoshibo mei mapang tatembanglen tonga aruogo. Ajisüaka, alima tali tatsükba akümba ajanga mei mapang mesüaka anü kanga tsüka apuba den külemi, alima tsüngsang mopunga balaka küma melenshiba yong nisungeri pei taküm kümzüka ayutsübaji kanga dang tongtipang kümogo.
Pei temang kümzüka alitsüren nung tongtipang shilem kaji pei temang indang teküp kümzüka ayuba lir. Nisung temang shilem nung teküp ya shilem tulutiba lir aser cancer tashidak rongnunga teküp indang cancer tashidak meimchirtem rongnung kanga bulua atemba osang bushiteta lir.
Teküp cancer tashidak rongnunga Melanoma tashidak ya tesashitiba ta American Academy of Dermatology-i bushiteta lir. Meimchir noklang nung shilem 4 dak dang melanoma tashidak adoker saka cancer tashidak agi shiranga asür noklang nung shilem 79 tashi iba tashidak agi shiranga asüba kuli nguteta lir.
Iba tashidak ya arishi küm 45 nungi 55 tain nisungtem dak adokba osang bushiteta lir. Ajisüaka, anü tatsük nem tali wangdaktsüba ajanga lanurtem rong nunga iba tashidak adoker ta cancer mongintemi metetdaktsüogo.
Cancer tashidak adoktsü tsüboa anü nungi atsüka alitsü menungdaker saka lendong nungi jenboa alitsü mechi peisasa kümdanga alitsüji kanga dang tongtipang.
Anü tatsük nungi pei temang teküp kümzüka ayutsü tasa kar yangi lemsateper:
1. Aküm nung alitsü merangtsüla: Pei temangi nüngdakba Vitamin D angutsü asoshi anü nem temang wangdaktsütsü nüngdaker. Ajisüaka, iba tajangzük angutsü asoshi minute 10 shi dang nüngdaker aser kasaji anepdang mesüra nikongtsütsü agiba tajungba asütsü. Anepdang 10 ako nungi tenzüka nikongtsütsü 4:00 ako tashibo anü tatsük nem mewangdaktsü nung ajungtsü. T-shirt tola asemba kisüngi anü nungi adokba mim tashi menokdangtetba osang bushiteta lir. Anungji, aseni anüngdang T-shirt tola den temelemba süoshi agiba den külemi, anü nungi adokba UV mim nungi kümzüktsü mozü agi shidokba süoshi asemtsüla.
2. Tapet Sun Protection Factor (SPF) shimtsüla: Temang nung nülokba SPF sunsreen ajakibo UVA aser UVB amala anü nungi adokba mim menokdangteter. UVB mim-i nisung indang DNA aser cell raksaja temang nung talisa, teküp nung cancer tashidak adoktsür. Anungji, UVA aser UVB mim naprongla nungi teküp kümzükba sunsreen bushia temang nung anütsüla. SPF noklang nung shilem 30 tashi agütsütetba sunscreen temang nung anütsü asoshi mozü mongintema metetdakja lir. Kasaji anü nem apudaktsüba ghonda tesadang ka shi jakdang anütsüla.
3. Teküp mapang shia tedangtsüla: Teküp aser teküp den sentakba tashidak doctor, dermatologist den küm nung kenbosa ajurutepa asen teküp tendangtsüji kanga dang tongtipang. Asenia asensasa asen teküp tendangtsüla. Aji oda, asen temang nung lepluscü kanga naka akümba mesüra tulu küma azüa ayimba mesüra teküp nung temelenshi balaka adokba bushitetra, tekarba mapang nung doctor nem kasaji reprangdakja tendangdaktsütsüla.
4. Temang nung aketba mim agienba chiyongtsü/mozü achitsüla: Süngjanglijang aser süngolio achiba ajanga asen teprangtsü tajungba kümdaktsüba den külemi, cancer aser iba ama lendong bener arutsüba tashidak jenti den raratsü tashi asen temang nem agütsür. Ano, doctor den ajurutepa asen temang tali tashi itshitsü mozü mora achiba ajanga aseni asen temang tajungba jenjang nung yutettsü.
(Source – Internet)

You must be logged in to post a comment Login