Telumiba Benjong Aküm : (Yona 3)

Esther aser la tembartem lumibaji Chuba tsüngdang mepishitsü asoshi terenemba liasü. Chubatsür aser lar kilir anogo asem tashi lumibaji bilemdangang! Kibubai la balaka tasü itdaktsü. Lai sangdong, “Ni samara, ni samatsü!” (Esther 4:16). Mangyimba anogotem jagi pelatepba anogo sottsü. Chubai lai mepishiba mela. Anungji Yihuda nunger “pelatep aser tenüngsang agütsü” (8:16). Tajepba melii asenok koda menütsü akoktsü? Mangyimba melii koda tsüngsangtsü? Yisui ashi, “Shirnoki mang ayimer parnok tepelatsü kechiaser parnok süneptsütsü,” (Mt. 5:4).
Ninive Chubai Tsüngrem taochi asoshi nisung aser shiruru ajaki lumia ayimtentsü ozüng agütsü. Parnoki kechi inyak iba nung Tsüngrem pelaa liasü aser o bendangba agien (Yona 3:7-10). Noklang nok yimti aser jila ajak nung pretshidar. Temenen jateta adoker aser obendangba arulanglang. Ajemalua temulung meyipa aser sarasadem agi dang timtemji nokdangtsü akok. Shirnoki parnok teka abelen aser achichilen mebendangtetter parnok samatsütsü. Pai kodanga mulunga mali. Tsüngremji Kümtetdakba ka lir (4:11). Saka Pai mulungba atalokdaktsütsü Pai akhanger. “Kü nüburtemi parnok sasa ajemaludi süra aser sarasademra… Ni parnok lima anebtsütsü” (2 Puti. 7:14).
Aikati telumibaji Tejen Lai nung amshia aruba yimya ka dang lir ta melamela ashir. Saka Tasen Lai nunga tamangertemi lumiba nungi tajangzük agia aruba angur. Yisui Tenem nung sayutsüngidang ashi, “Kodang nenoki lumidir” (Lumira ta mashi) (Mt.6:16).
“Lumiba tetezü nendaka shisadangba,” ta Oswald Chamberi (1874-1917) My Utmost for His Highest nung zülu. Nai maneni lumira tepela aser Tepela Benjongji ne meyong asütsü (Zek. 8:19).
Kibuba Yisu, lumia sarasademba nungi Tepela Benjong akümtsüsa lumitsü kü dang yariang. Amen.