Telungpur teloktem den ken o jembitsü sentong lir: Manipur CM

Imphal, November 17 (Agencies): Chandel district densema Manipur nung tesem balala nung sorkar anema inyakba mapatem kanga buluba dak sendakba nung state chief minister, N Biren Singh-i, par sorkari telungpur telok balala den ken o maneni jembitsü atema sentong yangludar, ta metetdaktsü.
Bodhbar aonung Tamenglong district nung gari lendong nung asür police asem kinüngertem semdangba sülen pai, “Rara ajanga lenmang kecha mangutsü, aser ibaji ajanga state nung tesünep aser azükaru dang raksatsür,” ta ashi.
Tesüiba anogo pezü tsüngda Manipur nüchiso atema rarar teloktemi Chandel district tesem balala nung Assam Rifles sepaitem anaben makogo, aser iba mapang nung sepai asem asü.
Ken o latettsü atema yimtenren ken o jembitsü nüngdaker, ta shia home portfolio-a repsema abensang, Biren-i, state nung telungpur telok balala den ken o jembitsü atema state sorkari Centre dang nungi temelaba atadar, ta metetdaktsü.
Hombarnüa Naga nunger timba aliba Chandel district headquarters nung telungpurtemi IED bomb tesashi ka pokdaktsüba lendong nung 18 Battalion Assam Rifles sepai ana asü aser trok yirua liasü.
Bodhbarnüa kasa district kübok Sajik Tampak anasa telungpur o 4 Battalion Assam Rifles tsüngda khatepdang sepai ka den telungpur ka asü aser AR sepai ka yirua liasü.