Temelenshi asoshi tenla

Tanü asen lima nung temelenshi nüngdakba indang ajaki kanga jembir, kechiyong kija kibong shia libaliroba yimya nungi tenzüka yimten nung yimsüsüba maparen tashi nung temelenshi aika nüngdaker. Item temelenshi nüngdakbatem indang jembiba rongnung election timi magitetba ajanga asenok timtem takoksa anguba tensa tia ya melenshitsü jembiba yasa rongdak nüngdak tulutiba asütsü. Asenoki mapa meinyak angati rongsen bushiba, mapai mao angati ita sen aginüba aser pei mapa nung ochimashi aser menendak inyakba tesem ajak nung temelenshi nüngdaker. Aji oda, temelenshi nüngdakbaji asenok alidak yimti yimdong merüka ayutsüla, government mozü kidang taneptsü angutsüla, government school nung shisaliok tajung angutsüla, light aser tzü agi manüngtsüla aser lenmang tajung temenungratsüka yanglur yangji nümadangdanga senzütsüsa temelenshi nüngdaker. Ajisüaka, temelenshi arutsübaji asenok nisung shiai langkabosa tenlatsüla. Iba tenlaji ayatzüra arema ochishia litetba asütsüa akok, nüngsen agia ochi nung nokdakba asütsüa akok, ochishiba ajanga takoksa aremba asütsüa akok aser tai dang taia ta shiteta ozüng raksaba mapa meinyak aremba asütsüa akok. Item amaji pei lima atema ochishia nokdaktsü aser inyaktsü merangdang, ashiko, taküm dena aotsüa akok. Ajisüaka, temelenshi ya aiben nisung kari pei taküm bendanga agüja meinyakra marur. Iba tangatetba nung asenoki asen lima nung temelenshi tajung adoktsü atema tamajung aser meshitakba mapatem den haihaura mekateptsüla. Atangji, nübortem asoshi nüngdakba temelenshi bener arutsü atema tashiyim amshia azü tokshia inyaktsü majungshir aser menüngdaker saka meshitak, tai aser ochimashi mapatem dang tasü itta nung ta shitettsüla. Asen limai temelenshi tajung ka bener arutsü atema Clean election onük jembia senzüdang, kenü tsürabur kati pa taküm kuli ashiba o ka yangi tanübo tazüngertem den lemsatepner. Pai ashiba agi, pa government mapa nung alidang aiben election mapang rara adokdak aser tashiyim amshidaki election duty-sa yok. Item tesemtem nungji aiben nisungtemi tashiyim amshia tangar shinga marudaktsüi parnok ishikati dang vote agütsü. Parnoki tashiyim amshibaji ozüng anema aser ochimashi mapa tulu, saka election maparen ketdangsütsü yokertem jagi parnok dang kecha meshitet aser nung ta ashitsü aser nokdangtsü melen tashiyim amshirtem denji külem ser tangar meyong vote ajakji ajener enoktsü aser election shitak kanga junga agiogo ta kulisüa zülur election agiba mapangji tembang. Item election maparen ajungaji meshitak aser ochimashi agi sünga liasü. “Iba mapang nung to onoki taküma mapayui bendanga agüja tashiyim inyakertem dang nung ta ashi asübo aser nokdangtsü merang asübo, ashiko, onokbo sür lila, saka onok taküm agi tenla agi election-bo shitak jungjunga agila,” ta iba nisung jagi ashi. “Onoki taküm tenla agüja election nung tashiyim amshiba nokdang asübo, tanü asen lima nung Clean election indang yamai rongdak nüngdaka jembitsüsa asen lima meraksai lila,” ta iba nisung jagi kanga saseta ashiba olen ta teti bilemtetter. Tanü tambusang jagi bilemba ama, asenok kari taküm tenla magütsüra Nagaland nung asenoki yongyaba temelenshi tajung ya marutsü. Tang tashi nung agia aruba election teimbaka tashiyim aser ochimashiba mapatem agidang agia aruogo. Election nung akokbaji tashiyim amshir nisung tamajungertem tayari ajanga dang akok nungji, government-a item jagi dang amshir. Anungji, tamajung anema nokdaktsübaji tetsübutsüka, tarendaktsüka aser mapa tasak ka kümogo. Ajisüaka, item tashiyim aser tamajung anema taküm tenla agütsütsüa mekurui ochi aser tangatetba tongpang nung menokdak tashi asen limai asenoki yongyaba temelenshi ya marutsü. Temelenshi bener arutsü atema senso shiai tenla langkabosa agütsütsüla. Iba tenlaji election nung vote mayok aremba, timtem arema pei vote peisasa enoktsüi aoba aser ozüng raksaa tashiyim amshirtem dang nung ta tasü itta shitetba tenlatem asütsü akok. Koba tenla südir süang, asen-a temelenshi tajung bener arur rongnung ka asütsüla.