Temulung Kuremba

Asenok aika taküm nung tangari jashidaktsüba agi tako chitetbaji amadoktsü kanga tasak aser ibaji
bilemtet shia asenok jashir aser mangyangner. Ibaji amadoktsü merangaka ma ta asen mulungjangi arupet arur aser iba jagi asen pelanüaka mepelatetter ta asenok aika mulungjang kurema alitsüa akok. Ibayongji Ibri 12 :15 nung ashir, ” tako süngra kar meiteta adoker iba jagi timtem agüjalir, nenok shinga Tsüngrem taochi magizüki malitsüsa kümdangang.” Tetezü asenok taküm nung Tsüngrem taochi agizüka alinung dang asenoki tangar dang taidoktettsü aser asen anema tamajung inyakba ajak amadoktsü. Taküm nung asenok mulung kuremtsüsabaji maparen tapu balala nung ataloker. Karbo tanur asüdang kari mezüngmeshia amshiba agi temulung kanga mejungi yirur alitsü akok. Karbo kidang apuani, adianu aser medemertemi jashidakja alitsüa akok. Ano karbo mapa inyakdak külem medemertemi temulung yirudakja alitsüa akok. Ashiko, item tekuremji nü mulungjang nung bener pelanüka mepelatet alitsüa akok. Aji oda, anogo shia item tejashi jagi asen mulung menentsüba asen mapa nunga tamakok ngua alitsüa akok, kechiyong jashia aliba mulungjang nung tajung inyaktsü mebilemer, anungji azükaru masür. Ajisüaka, asenoki metettsüba kaji, ashiko akhidang nisung kari asen mulungjang yirutsüsa inyaker aser jembirtem tobo temulung meyiper mesüra tamajung inyakba ajak to amadoker pelashishia alitsüa akok. Mesüra, asenoki jashir dang ashi, parnoki asen mulung yirutsütsü aser jashidaktsütsü asoshi inyakbabo masütsüa akok. Aji oda, kodang asenoki akhidang tangari asen mulung yirutsüba aser mepeladaktsüba mapatem ajak asen mulung nung kuoka yudir, ibaji asen mulungjang nung süngra tamajung ka süoka ayu ama asütsü aser ibaji ano tanaben meitettsü aser asen dang masü saka tangar a yirutsütsü. Ibayongji Laishibai asenok kümdangshidaktsür. Kasa Laishiba Ibri 12:14 nung ashir, nisung ajak den yimjung nung alitsü merangang aser temeshiba koba makaibo Kibubaji mengutettsü, iba temeshibaji arishia oang. Iba Laishiba nung ashiba tajungshi o ya Tsüngremer taochiji lir. Iba o ya asenoki angara, asenok temeshi akümtsü aser asenoki tangar dang taidoktettsü aser asen mulung yirutsütsüsa tangari jembiaka aser inyakaka asen meyirutsü. Ibaji tangar asen dak jungjunga repranger injang kaloktsüaka mekashiba amai lir. Item ajakji Tsüngrem taochi ajanga lir. Tangar asenok kanga jashitsüsa inyakba agi, asenoki parnok dang teti jashia bilemtsübaji tim dang amai asenoki bilemtsüa akok. Ajisüaka, Tsüngrem o agi ashir, asenok mulung kurema aliba jagi asenokang yirutsü. Tsüngremi aji meteta lir. Atangji, asenoki ken nung atenba ama, ali tembartemibo asenok jashidaktsütsüa akok, ajisüaka asenok jashibaji memetettsüsa mesüra asen mulungjang yirua alibaji maneptsütettsüsa asen Tsüngremji asenok nungi pilar alir masü. Paji teti asenok den lir. Pai asen mulungjang yirur alibaji angur aser asen jashia alibaji Pai meima repranger. Ajisüaka, kenken asenoki asen jashiba aser timatembaji Tsüngremi mangur ama bilemtsüa akok. Idangji asenok tali tali jashir aser Tsüngrem taochi magizükteti pilaadoker. Tangar dang tai medokteti kurema aliba jagi asenok temenen lar kümdaktsür, iba jagi asenok teti jashia alir. Ajisüaka, asenoki Tsüngrem dang asen mulung yirua aliba aneptsü atema taochi meshira, Pai iba taochi jagi tangar anema kurema aliba tejashi tia nungi asenok kümzüktsü. Tsüngrem taochi agidang asenok kümzük aser iba kasa taochi jagi asenok mulung pelaa alitsüsa Pai asenok mulung yirua aliba aneptsütsü.