Temulung lemtettsüsa alitsüla

Tanü asen lima nung ajak atema tebilemtsü tulutibaji lanurtem mapa manguba mesüra lanurtem mapa meinyaki kazüba ya lir. Iba tebilemtsü yabo gari lenmang majungba aser light junga maruba tebilemtsü dang nungi tuluba aser tamajungba anungji yimten, lokti aser arogoi dena kanga süoki ia arsangokja inyaktsüba mapa ka lir. Shin o nung ashiba ama, kecha meinyaki kazüba temulungjangji temenen mapa inyakdak lir. Anungji, mapa kecha meinyaki kazüba lanurtem temulungjang ajakji temenen mapa inyakdak akümer. Ibaji jungjunga bilemdangra, kanga tetsübutsüka lir. Aji oda, tanü asenok den mapa kecha meinyaki alir lanur paika mulungjang ajak ya temenen mapa inyakdak aküm nungbo asüng asen lima ya kechi tia ka nung alitsü ta asenok ajaki shisabolua bilemtsüba mapangji tang lir. Iba shisaboluba jagi lanurtem asoshi mapa bushitsütsüsa akümer aser mapaji angutsü atema mapa adokdaktsütsüla. Ajisüaka, lanurtem asoshi mapa inyakdak tesem lapoka mapa adokdaktsütsübaji mapang agitsü, anungji itemji bilemdanga alidang tangsa tang lanurtem kar nembosa mapa agütsütsü asoshi tesem karbosa bushitsütsü nüngdaker. Aji oda, item tesemtem rongnungji kabo taxi aser auto rickshaw aniba mapa ya asütsü ta reprangtetter. Atangji, Nagaland sorkar sentong nunga taxi aser autorickshaw jajadaktsübaji oli orartem asoshi dang masü saka tongtibangbajibo lanurtem nem item gari anishitsü asoshi mapa agütsütsü nükjidong nung amshidaktsür. Aji oda, lanurtem aika item gari anishiba agi kibong mesüa anisüngzüka aliba angur. Ajisüaka, tanü Nagaland nung aser talisa Dimapur nung taxi aser autorickshaw anishirtem züngdangra, Naga nungertem dang nungibo tsümar teimba züngtettsü. Atangji, item garitem amshitsü temelabaji Naga nunger lanurtem nem dang agütsür asünungji tsümartemi anishiaka tenüngbo Naga nunger tenüng nung agütsüba licence asütsü. Iba ama asenok shisamaka, azümasen aser tamakok tia nung timtemba ngua taoba hopta nung asenoki iba osangkaket nung ” Dimapur nung autorickshaw aser taxi anishirtem ajak ya Naga nunger lanurtem asünunga koma süla ?” ta asüba tasüngdangba nung shisalemsatepogo. Aji oda, tazünger aikati shilem agia pei tebilemba lemsatepba atema kanga pelar. Item tebilembatemji jungjunga bendena reprangdangra, asenok aikati Naga nunger lanurtem dak temulung melemtetba reprangtetter. Ibaji tashidak shitak ka putetogo ta bilemer. Lanurtem dak aketba iba tashidakji aneptsü asoshi tangar doctor bushia aotsü nüngdak madoker, saka peisasa pei jakla yimya, achiajem aser awashi tajungba küma melenshi nung iba tashidakji aneper asütsü. Iba ama temulung melemtetba agi, asenok aikati Naga nungertemi anishiba taxi aser autorickshaw nungbo memenener. Ibaji dang masü saka senzüsenpongba jenjang (bara)kasasa meshiaka tsümartemiang dalangba meshir amai bilemer. Atangji, Naga nunger taxi aser auto anishir aikati chiajemer anishir aser sena tali meshia alitsü. Iba jakla tamajungji melenshir Naga nunger taxi aser auto anishirtembo süoshia merükmerüka sübor, o tanük jembia aonunga passengertem kecha metsübui temulung lemtet lemteta amentsüsa litetra, Naga nunger lanur azükaruji iba nung jagi tenzüktsü. Idangjibo, tsümar gari anishirtem aika anendena liaka Naga nungeri aniba gari dang bushia arua amentsü. Aji oda, asen nisungi dang masü saka tsümartemi dena Naga nungertemi aniba gari nungang mennütsü. Iba tashiji asenok Naga nunger lanurtem dak ajaki temulung lemtettsüsa alitsüla. Jenjang kasa dang meshir saka asen nisungi tsümartemi aniba gari dang bushia menner ta asübaji tsümartem den senzüner masü mesüra tsümartem nemang sen agütsüner masü saka pei nisung dak temulung melemtetter. Aji oda, tanü Naga nunger lanurtemi asenok mapa manguba ya mapa makaba agi masü mesüra mazüng mashiba agia masü mesüra azümasenba agia masü saka asenoki asen dak asen nisungtemi dena temulung melemtettsüsa aliba ajanga lir ta angateta tangsa tang melenshitsüla. Tanübo Naga lanur asoshi mapa angutsü atema tematiba aser tenüngdaktiba ‘qualification’-ji ‘Temulung lemtetba’ asütsü.