Temulung lemtettsüsa lidi

Nagaland nung tang timtemba ya senotsü makaba agi timtemer masü saka temulung lemtettsüsa shingaia meinyaktetba agi timatemer. Alima asünungji nisung aika kodang pei keti rongsen arudir aibelenadoker. Iba jaklaji meteta yimten nung ochishia inyaktsü asoshi ketdangser aika shimer. Aji oda, deparment ka nung Secretary tuluba ser Joint Secretary , Deputy Secretary aser Under Secretary tashi mapa shia telemtetba külemi agitsü asoshi nisung aika ajanga aotsüsa government inyakyim lir. Iba kasaji Directorate nunga Director-i anir Joint Director, Deputy Director aser Assistant Director tashi ayur aser kasaji PWD, PHED aser Power department ama nunga Engineer-in- Chief, Chief Engineer, Superintendent Engineer, Executive Engineer, SDO aser Junior Engineer tashi luagi department-i inyakba mapa reprangtsü asoshi shima lir. Item ketdangsertem jagi memetet ser mapa kata meinyaktettsü aser yamaji parnoki memetet ser department nung senotsü meindoktettsü. Item ajak madakji ano government senotsü züngzünga amshitsü asoshi Finance deparment lir. Iba department nunga Finance Commissioner nungi Under Secretary tashi nung ketdangsertem table aika ajanger külen dang senotsü enoktsü atema telemtetba agitsüsa inyakyim latetja lir. Khen bilemtsübo department ka nung ketdangser paikaji nüngdak madoker. Katia koker mesüra ka manemdang temelener alitsüsa ketdangser ana tashi ayutsüa akok. Ajisüaka, government (nübortem) sen aika endoka ketdangser paikaji ayuba nükjidongji telemtetba shitak agitsü aser ochimashi mapatem nokdangtsü atema lir. Ibayongji, kati shisatsü agi matong agibo kati tongja telemtetba shitak agir aser kati ochimashi inyaknüyongbo tanüngba ketdangsertemi soiter. Iba jagi department nung mimshia ochimashi mapa meinyaktetter. Ajisüaka, department ka nung danga ochimashi mapa inyaka lira, ibaji ketdangser tuluba kijai masü saka ketdangsertem ajak bangjemer inyaker asütsü. Aji oda, Commissioner aser Secretary nungi Under Secretary tashi aser Engineer-in-Chief aser Chief Engineer nungi SDO aser JE tashi bangjemer inyakra department ajak ayokyonga shingaia memetettsü. Tanü Nagaland nung sen makaba agi terenlok mapa meinyaktetter ta jembiba ya sen makaba agi masü saka ketdangsertem longjemer maka kümdaktsüba agi makar. Ashi, Delhi nung sen maka masü kar. India government ya sentsüh agi nembanger Nagaland ama state nem nüngdakba sen magütsütet timtemer masü saka asenok timtembaji asenok ochimashiba tashidak agi timatemer. Aji oda, tanga department-bo yutsür department ajak azüoka ketdangsütsü shimtetba Finance department dakang nübortemi tuluba temulung melemtettsüsa inyakbaji Nagaland asoshi tia kanga majung asütsü. Aji oda, ACAUT teloki aitsüba ama, Finance dapartment-i department ajak senotsü amshiba sobaliba nung ochishia inyakdaktsütsü melen, parnokiang anir ochimashi inyakra, Nagaland-bo maliang tajungba. Alima asünungji, department aikati ochimashi inyaknütsüa akok saka Finance department nung minister-i anir ketdangsertem ajaki Nagaland meima inyakra, Nagaland topur ajungtsüji yang nung jagi tenzüktsü. Yimten nung yimsüsür aser ketdangertem ajak amato mejungi kümadoktsüa akok saka state nung Finance aser okadak obendangba menden nung amenertem shitak tsüngchisa lira, lanurtem asoshi teimla mesamar. Ajisüaka, Finance khuret abenertemang ochimashiba aser obendangertemang meindangba ta kümadokra, iba limajibo tetsübutsüka aser shisabolutsüka lir. Asüng iba lima nungji government aser obendangdak mali amato kümadoktsü, anungji nübortem ajak temai adoker tashiyim agi pei akok rongsen benden tenzüktsü. Idangji, iba lima nung rongrong aser azü tokshi lendong tulu alitsü. Idangjibo, nisung ajaki pei mulungba inyaktsü. Iba ama tensa ka ajurunüa ariteper amato tanü asenoki inyaker. Item lendongtemji paidoktsüsa, asenokbo tanü yangluli asüng yokdokli ta asüba ki masü, saka tarutsü pututem nung alitsü pur asen chirnur aser semchirsemnurtem tesünep nung kati ka dak temulung lemteta  alitsüsa, Nagaland ya ochi agi tasen küma jungjunga yanglutsütsüang bilema inyakdi.