Temulung süa aliba taküm

Jangratema, tenük sünga aser pelapelaa aliba dang Ao o nung ‘temulung süa alir’ ta jembir. Ajisüaka, asenok asoshi alima nung teti temulung süa alitsübaji kanga tasak, iba yongji asenok aika temulung mesüi alir. Temulung süa aliba tetezü pelapelaa aliba süra temulungmesüi aliba tetezüji jashia dang aliba takümtem lir. Asenoki sen aika angudang temulung asür, ki tajung nungmeshirangi chiyongtsü tajung den chiajema alidang kanga temulung süa alir.Asenmapa nung takok angudang aser tangari asen nüng asangdang asenok kanga temulung asür. Ajisüaka, kodang asenoki bilemba ama alima rongsen majangzüktetter aser tangar menepa melitetter, idangji asenok temulung masür. Asenok makamaitba mapang aser shilumanem dang asenok taküm aser kibong temulung süa malir. Tangari asen nüngsen jembiba angashidang aser atalatsü dang asenok kanga temulung masür. Aji oda, abensüoshi agi meperidang aser chiyongtsü agi anüngdang asenok temulung masür. Kinüngtsü aser kinüngboi asen aginütsüsameinyakdang,mesüra taburtemi aseni imlaba ama takok bener marudang mesüra yimten, arogo aser loktii aseni imlaba ama meinyakdang asenok temulung masür.Atangji, itemjimeimchir yimya. Iba jagi nisungtem teti pelaa melitetter. Ajisüaka, tenyari Paul-ibo tensa tia ajak nung pa temulung süa alitsü angazükogo ta Filipi tapu 4:11 nung shia lir. Ibaji jangratemtsüka, kechiyong alima nung teti temulung süa alitsü angazükba tetezüji kechi tensa tia arudir aruaka teti pelaa dang alir, teti tenük sünga dang aser teti temulung süa dang alir. Ibaji alima nung nisung ka asoshi tesüngmangtsü aser tenükshitsü takümlir. Iba lima nung nisungtemtejak aser temulungjang reprangdangra temulung masüba agi sünga lir. Ki tajungtiba aser gari tajungtiba agia nisungtem temulung masür, kechiyong alima nung tetoktepba onsara aser anogo shi tasen-tasen aser tajungba-tajungba adoker.Aji oda, kodang asenoki asen taküm libaliro tangar den medemdangdir, asen dangbo tangar takarba aser tangar tajungba angur, iba jagi asen akaba aser asen nem moatsüba agi asen temulungmasür, anungjimepelar. Ibaji asenoki Yisu Khrista dak amangba ajanga tensa tia ajak nung temulung süa alitsümangazükba ajanga lir. Paul ya par nübortemmadak yimten tashi tulu akaba nisung liasü. Tepuokdak timtema alibajia pa liasü. Ano, teloki pa tasütsüsa long agi aonba lendonga pai ajangshi. Atangji, alima nungbo yimten tashi tulu amshia merena alitsü akokba nisungji Paul ka liasü, saka kodang tanüla temeshii pa apu, pa tenüng, pa jakla aser temulung melen aser Yisu Khristaji alima meimchir temenen yong asü ta pai agizük aser kuli asütsü tenzük. Pa temulung memeyip dangbo anogo shia temulung masüba agi pa mulungm sünga liasü. Teti tejashi nung pai Khristantem reshikangshi.Aji oda, paimetetba aser akaba ajak toktsür pai kodang Yisu Khrista sülen anidak, iba jagi pa peladaktsü. Aji oda, Yisu Khrista sülen anidakba kija agi pa temulung süa aküm. Atangji, Paul teti temulung süa pelapelaa alibaji alima tensa mapang ajungba agi masü mesüra ajaki pa meimbamesüra tushiba agimasü, saka kechi tensa tia nung lidir liaka, paji Yisu Khrista den tesendaktep shitak yutetba ajanga liasü. Temulung süa aliba agi Tsüngremi asenok nem moatsüba madak asenok jangratema alir. Temulung süa aliba agi asenok tenükmerem nungi jenbur aser ajak den putepa litetter. Temulung süa aliba agi asen tasü itdaktsür, kechiyong Tsüngrem asenok den lir ta asenoki meteta lir. Filipi tapu 4 nung Pauli yamai ashir, ” kechi koda ajemzüka alitsü aji ni metet, aser kechi koda jenti kaa alitsü ajia ni metet— iba miim oji ni angazükogo. Khristai shibai ni tashi itdaktsür, pa ajanga ni ajak inyaktsü akok.”Asenoka Khrista dak amanger süra, tensa tia ajak nung temulung süa alitsü angazüktsübaji kanga tongtibang. Iba jagi tatidang aika koktettsü.Ajisüaka, Laishibai ashir, teti temulung süa alitsü angazüktsübaji ‘miim o’. Tetezü, kanga nendaka bushi nüng dang aser kanga mepishia asüngdang nung dang angutsü aser agütsütsü.

You must be logged in to post a comment Login