Temulung süa aliba

Alima nung pelapelaa temulung süa alitsübaji nisung ajak atema kanga tongtibang lir. Aji oda, alima nung temulung süa pelapelaa malirtemi alimai arua malang aser tasoa meshizük ta kanga nemjema jembir. Aji shitak lir, kechiyong alima nung kangshia aser jashiseta alitsü atema asenok meyok saka Tsüngrem tenüng sanga Pai moatsüba agi tenük sünger asenok pelatepa alitsü asoshi iba limai yok. Ajisüaka, iba lima nung asenok temulung mesüi alitsüsa asenoki bilemer, nükshir aser inyaker. Anogo shia oset tasen tasen adoker aser itemji asenoki alia agitet nungbo iba jagi asenok temulung süa alitsü amato bilemer. Asenoki aiben tangar akaba den asenok rongsen aser libaliro jenjang medemdanger aser kodanga temulung masür. Iba jagi asenok pelaa malir. Aji oda, asenoki asenok akaba rongsen aser asenok taküm libaliro jenjang nungi tepela angutsü meranger. Ajisüaka, asenoki metettsüba kaji, asenoki asen akaba rongsen aser asenok aliba libaliro jenjang nungi anguba tepelajibo teti atema masü. Ashiko, kenübo rongsen ajakji samatsüa akok mesüra rongsen jagiang lendong timtem bener arutsütsüa akok. Aji oda, asenoki chia ajemba chiyongtsü, asenok agiba sübosülemtsü aser asenok meyong osettsüsettem nungi anguba tepelajibo manger sangwa nung samatsüba tepela lir. Ajisüaka, koba tia nung lidir liaka, teti dang temulung süa alitsü aser kodanga mesamatsüba tepelajibo Yisu Khrista den tesendaktep akangakanga aliba ajanga  dang angutsü. Ibayongji, tenyar Paul-i Filipi 4:11 nung ashir, “ni makamait indang jembir masü, kechiyong kechi tia nungsa ni lidir, iba nungji ni temulung süa alitsü ni angazükogo.”  Paul ya yimten nung tashi tulu akaba nisung ka liasü. Alima nung pa sünütsüsa jangratema aliba nisungji pa ka liasü. Ajisüaka, item alima tashi, jangratem aser tepela ajakji toktsür pai Yisu Khrista nungi anguba tepela agizükba agiang temulung süa liasü. Paul-i Yisu Khristaji pa taküm nung kibur ta agizükba sülenbo pa tepuokdak aliba mapang aser teloki pa long agi onseta südaktsütsüsa aliba tensa tia ajak nung  pa temulung süa dang liasü. Paisa Filipi 4: 12 nung ashir, “kechi koda ajemzüka alitsü ajia ni metet aser kechi koda jenti kaa alitsü ajia ni metet. Kechisarina nung aser ajak nung anünga alitsü aser ya-a alitsü, jenti kaa alitsü aser anünga alitsü, iba mim oji ni angazükogo.” Atangji, Paul taküm ya asenok den medemdangtsü makok. Pa kanga merena aliba nisung ka, anungji pai alima rongsen agia temulung süa linüra litetba jenjang ka nung liasü. Ajisüaka, pai item dakji jangratemtsü mangu. Aji oda, Yisu Khrista akaba ajanga dang pai tashi itdaktsür ta pai angatet. Asenoki aiben asenok akaba nung temulung masür, iba jagi tangar akaba dak tenük meremer. Aji oda, kodang asenoki asen nüngdak ajak Tsüngremi agütsür ta mangatetter aser mamanger, iba dak nung jagi temulung masüba tenzüker. Asenok pelaa linüra Tsüngremi asenok nem kechi moatsü, idakji temulung asütsüla. Pei akaba nung temulung süa aliba mulungjang nungi tenükmerem shisatsü madoktsü aser asen mulungjang nungi tenükmerem madokra, asenok teti pelaa alitsü. Tenyar Pauli jentia kaa alidang aser yaa alidang,tensa tia ajak nung Tsüngrem dak temulung süa alitsü angatetba miim oji asenokia angatettsü merangdi. Alima rongsen aser jenjang dak asenok temulung süa alitsü merangyonga makoktsü, kechiyong nisunger taginübaji tanen maka aser nisunger tenükshibaji asadangtsü makok. Item nung jagiang nisungtem rongnung rara aser tetsükchitep adoker. Aji oda, asenoki alima tepela nung masü saka Tsüngrem nungi anguba tepela aser temoatsü nung temulung süa litetra, alima nung tasoshia alitsüba temoatsüji aji asütsü. Ibaji shisa akariang ajangzüktetter.