Tenangzükba asemsü (T.Ken 62: 1-12)

Tekong 2,5 aser 12 nungji asenoki ataa aliba nung yaritsü asoshi tenangzükba asemsü agüja lir: Tsüngrem asenok Tekümtet. Tsüngrem asenok Teimla. Tsüngrem asenok Timsür. Item asemji asenoki shisadangdi.
Tsüngrem asenok Tekümtet. Dawidi temenen nungi kümzükba indang masü lendong nungi kümzükba indang jembi. “Paji dang kü lung aser kü tekümtet, pa kü mitsa takang, ni kodanga marakzütsü” (t.2). Yimya ama Dawid tsükchirtemi pa arishia liasü. Sauli pa tepsettsü meranga liasü. Aji saka Dawidi ashi, “Ni Kibuba dang ataa alitsü. Ni kü sasa mazüoki jenshia malitsü. Ni Kibuba dang ataa alitsü kechiaser Tekümtet Pa nungi arur.” Tanüa ibaji ochi. Asenok lendong lima nung alir. Asen meketa kinük nung kechi ataloker asenoki memetet, saka asenok Tsüngrem asenok lung aser Jenokdak tenangzükba kar.
Tsüngrem asenok teimla. Ne teimla nai kong repranger? Ne sasa dak, ne senpong, ne bank, ne tembartem? Ne tarutsü mejangja aser ammang asüdang nai kong repranger? Dawidi Tsüngrem dak reprang. “Kü nüla, nai Tsüngrem dak anisüngzükang; kechiaser kü teimla pa nungi lir” (t.5) Tsüngrem asenok Timsür. Iba yagi asenok o bendanger masü saka kulisürtem lir ta angatetdaktsüba nung tulu ka yarir. Asenok yangi asenok sasa timsüa malir. Asenok timsüba Tsüngrem nungi arur, “Tsüngremi nisung shia nem pei mapa yari agütsütsü” (Rom 2:6). Tanü nai timtem ajurura, Kibuba dang ataang. Pa nungi ne tekümtet, ne teimla aser ne timsüba arur.
Timtem mapang nung telangzüba mangudang nai kwiben ne sasa dak mesüra tangar dak repranger? Nai Tsüngrem dak reprangang, Pa nungi telangzüba ataang. Tsüngrem tama südakjang aser Pai na asoshi inyaktsü ataa liang.