Tenlaji Tenzükba!- Filipi 2:5-18

“Ni sannüker tajung, sannüker tajungi santem asoshi pei taküm yutsür” (Yn. 10:11).
Yisu dang tenla aser tenzükbaji kasa liasü. Ka meteni Pai ka atema dangbo mebilem. Asenokia koda? Khristan mapaji tashiyim agi inyakdaktsüba mapa masü saka medemer süa inyakba mapa koba nung tenlaa dena lir. Yisui ashi, “Nisungi tembar asoshi pei taküm yutsütsü, iba dangi tuluba shinga temeim mali!” (Yn. 15:13). Jenjang makaba tenzükba mapa jagi kecha matalokdaktsür. Tsüngrem aser medemer peladaktsütsü asoshi asenoki mapa asem tenlatsüla.
Mezüngbuba, konang. “Pa Tsüngrem mesüka liaka, Tsüngrem den saku alibaji sota ayutsü tim ta mezüngshi, saka peisasa tazüngla kümer, alar ama küma, nisung ama aküm” (Fil. 2:6,7). Asenoki asen jenjang nungi nübur jenjangi malu tashi asenoki tangar tenzüktsü makok. Temenen maliba Kümtetdakba temenen pur tembar aküm. Khristan shiai iba tenüng agitsüla. Tenla ki sabang nungi sayutsüngibaji Khristan kaket lenmang nung alemba mapa dang nungi tuluba masü. Mission B nung tekolakbaji aluyimertem den missionary mapa inyakba dang nungi tamarenba masü. Khristan tenzükba mapa ajakji kasa tamaren mapa lir. Temenen dang memenatsüla.
Tanabuba, jangratem. Iba anogo Yisu kanga aniatok aser yaa liasü. Saka Pai tanelatem anir aru. Pa ayabaji nübur liasü, chiyongtsü masü. Pai Pa nütsüngtem dang ashi, “Nenoki memetetba chiyongtsü ni kar … Kü chiyongtsüji shibai ni yok Pai mulungba inyaktsü aser Pa mapaji renemtsüba lir” (Yn. 4:32-34). Ainkar Amoni azümesenba Zion nung alirtem dang ashi, “Shiti pu yipten nung mepitaka alirtem, aser parnok sasa langbang nung songtoka alirtem, … marok nung yi ajemer, aser parnok sasa totzü tajung agi mezürtem, saka Yosef timtem tekangshi atema parnoki temulung ayanga mali (Amos 6:4-6). Yosefji talenba nung alar süa alir noksa lir. Temeimi ajungshia asenoki item asoshi pei yipten nungi adoktsüla.
Tasembuba, rongsen. Yisu takar liasü saka asenok takar kümdaktsütsü Pa sensaker aküm. Yamaji asenokia sensaker yaritsü asoshi asenok teka salatsüla. Yisui amitsür tenla aser Mary totzü junga agizük kechiaser tenapronglai bendanga agütsü. Asenok dak mekongshi tashi asenok agütsütsüla. Andrew Murray (1828-1917) ashi, “Nisung kati kwika agütsü ta asüngdanger: Khristai pai kwi ka ayu ta asüngdanger!”
Kibuba Yisu, Nai tenlaba aser tenzükba ama nia tenlatsü aser tenzüktsü kü dang yariang. Amen.